ShQO-daǵy qurylys nysandarynyń birinde 30-ǵa jýyq sheteldik zańsyz jumys istegen
ÓSKEMEN. KAZINFORM – Shyǵys Qazaqstan oblysyndaǵy qurylys nysandarynyń birinde zańsyz jumys istegen 28 sheteldik anyqtaldy.
Óńirde polıtsııa qyzmetkerleri kóshi-qon salasyndaǵy quqyqbuzýshylyqtardyń aldyn alý maqsatynda reıdke shyqty. Sonyń barysynda shetel azamattary kóbine jumys izdeıtin oryndar – bazarlar, kásiporyndar jáne qurylys alańdary tekserildi.
– Qurylys nysandarynyń birinde 28 adamnyń zańsyz eńbek etkeni anyqtaldy. Olardyń jumys isteýge qajetti ruqsat qujattary bolmaǵan. Polıtsııa qyzmetkerleri quqyqbuzýshylyqtyń jolyn kesip, árbir shetel azamatymen túsindirý jumystaryn júrgizdi, – dep habarlady ShQO polıtsııa departamentinen.
Tártip saqshylary sheteldikterge Qazaqstan Respýblıkasynyń zańnamasyna sáıkes qujattardy durys rásimdeý tártibin jan-jaqty túsindirdi.
Eske salsaq, osyǵan deıin Almaty turǵyndaryna zat laqtyryp, qol kótergen sheteldik jasóspirimderdiń elden shyǵarylatyndyǵy habarlanǵan.
