ShQO-daǵy qurylys kompanııalary 200-den astam úleskerden zańsyz aqsha tartqan

ÓSKEMEN. KAZINFORM — Shyǵys Qazaqstan oblysyndaǵy qurylys kompanııalary 200-den astam úleskerden zańsyz aqsha tartqany anyqtaldy.

ShQO memlekettik sáýlet-qurylys baqylaý basqarmasynyń málimetine súıensek, búginde oblys boıynsha 73 kópqabatty turǵyn úıdiń qurylysy júrgizilýde. Onyń ishinde 20 úı bıýdjet qarajaty esebinen, 53 úı jeke ınvestorlardyń qarajatyna salynyp jatyr. 

— Qurylys kompanııalary arasynda úleskerlerden zańsyz aqsha tartqandar bar. Sonyń saldarynan 200-den astam azamat zardap shekti. QR «Turǵyn úı qurylysyna úlestik qatysý týraly» Zańy úleskerlerdiń qarajatyn tartýdy qatań retteıdi. Alaıda tájirıbe kórsetkendeı, qurylys kompanııalary bul talaptardy oryndamaıdy, — deıdi basqarma basshysynyń orynbasary Samat Qaıyrdınov.

Onyń aıtýynsha, zań buzǵan qurylys kompanııalaryna ákimshilik is qozǵaldy. Olardyń qatarynda «Ray Residense», «Park Line», «Renesans 3», «Tumar Towers», «Viva Park», «Krıstal», «Grand Residense» kompanııalary bar. Al «Royal Finance Group» JShS jáne «Elit Stroy Group» JShS ákimshilik jaýapkershilikke tartyldy.

Eske salsaq, osyǵan deıin aqtaýlyq turǵyndar zańsyz qorshaýdy buzdyryp, qurylys kompanııasyna shaǵym túsirgeni jaıly jazǵanbyz.