ShQO-daǵy kóshkin qaýpi bar taý bókterindegi qar qalyńdyǵy tekserildi
ÓSKEMEN. KAZINFORM — Shyǵys Qazaqstan oblysynda «Qazseldenqorǵaý» mekemesiniń mamandary qar kóshkini qaýpi bar ýchaskelerge tekserý júrgizdi.
Altaı aýdanyndaǵy bes, Katonqaraǵaı aýdanyndaǵy tórt qar kóshkini qaýpi bar ýchaskelerge vızýaldy tekserý júrgizildi. Sonyń barysynda Altaı aýdanyndaǵy taý bókterinde qar qalyńdyǵy 80 sm-ge deıin, al Katonqaraǵaı aýdanynda 50 sm-ge deıin jetkeni anyqtaldy.
— Jumystyń mańyzdy bóligi retinde qar jamylǵysynyń turaqtylyǵyn dál baǵalaýǵa múmkindik bergen stratıgrafııalyq baqylaýlar júrgizildi. Qazirgi ýaqytta atalǵan aýdandardaǵy qar kóshkini jaǵdaıy turaqty. Sonymen qatar mamandar qar kóshkini qaýpi bar ýchaskelerdiń mańynan ótetin nemese kólikpen qatynaıtyn azamattarǵa barynsha saq bolýdy eskertip jatyr, — dep habarlady ShQO Tótenshe jaǵdaılar departamentinen.
Qutqarýshylar halyqty taýly aımaqtarda qaýipsizdik sharalaryn qatań saqtaýǵa shaqyrdy. Qar jaýyp turǵan kezde jáne aýa raıy qolaısyz bolǵan jaǵdaıda esh ýaqytta taýǵa shyqpaý kerek.
Tótenshe jaǵdaı týyndaǵan jaǵdaıda 112 nómirine habarlasý qajet.
Eske salsaq, osyǵan deıin Grekııanyń taýlarynda qar kóshkini júrip, tórt adam mert bolǵany habarlanǵan.