ShQO-daǵy kóppáterli úıler 30 jyldan soń ortalyq jylý júıesine qosyldy
ÓSKEMEN. KAZINFORM – Shyǵys Qazaqstannyń keıbir aýdandarynda júzdegen kóppáterli úı kúni búginge deıin ortalyq jylý júıesine qosylmaı keldi. Sonyń saldarynan turǵyndar kómir tasyp, ot jaǵyp, áýre-sarsańǵa túsýge májbúr, dep habarlaıdy Kazinform agenttiginiń tilshisi.
Páterler nege pesh jaǵyp keldi?
Oblys aýdandaryna taban tiregende kópqabatty úılerdiń qabyrǵasynan shyǵyp turǵan qubyrlardy jıi kóz shalady. Toqsanynshy jyldary aýyldarda ortalyq jylýdyń óshirilýi saldarynan úılerdi peshpen jylytýǵa týra keldi.
- Oǵan deıin iri kásiporyndardyń esebinen jylynyp turǵan kópqabatty úıler, KSRO taraǵannan keıin ortalyq jylý júıesinen aıyryldy. Bári birden páterlerge pesh saldy. Bul óte qaýipti ári joǵary qabattarǵa kóterilý de ońaı bolmady. Adamdar qysqy otyn jınaýǵa da daıyn bolmady. Jumyssyz, jylýsyz qalǵan aýyl turǵyndary týǵan ólkelerin tastap ketip jatty, - dep sol bir shaqty eske aldy Kúrshim aýdanynyń baıyrǵy turǵyny Bekmuhambek Raısov.
Osy jáne basqa da aýyrtpalyqtarǵa tózbegen halyq sany Kúrshim aýdanynyń ózinde ǵana úsh esege azaıdy. 47 myń adamnan 15 myń adamǵa deıin azaıdy.
Qańyrap qalǵan páterler
Atalmysh aýdandaǵy barlyǵy 45 eldi mekenniń, 6,5 myń páteri peshpen jylytylyp otyr. Biraq bul páterlerdiń jartysy qańyrap bos tur. Aýyldan ketpegenderdiń ózi jer úılerge kóship ketken.
Ásirese, shelektep kómir tasyp, joǵary qabatqa kóteriletin qarttarǵa qıyn boldy. Oblys aýdandarynda barlyǵy 10 besqabatty úı, 20-ǵa jýyq úshqabatty úı, 430-dan astam eki qabatty úı bar.
- Biz barlyǵyn tekserip, ár kópqabatty úıge qajetti jylý qýatyn anyqtadyq. Qazirgi ýaqytta ortalyq jylý júıesin qalpyna keltirý birqatar aýdanda júzege asyrylyp jatyr. Kúrshim, Tavrııa, Samar, Aqjar, Opytnoe pole, Marqakól, Bozanbaı eldimekenderindegi jylý júıelerin jáne qazandyqtardy qalpyna keltirý jumystary bastalyp ketti. Turǵyndarly jylýmen, jaıly ómirmen qamtamasyz etý úshin bul máseleni túbegeıli sheshýimiz tıis, - dedi ShQO energetıka jáne turǵyn úı-kommýnaldyq sharýashylyq basqarmasynyń basshysy Nurlan Ramazanov.
Oń ózgeristerdiń bastamasy
Aýdandarǵa jańa qazandyqtar salý, qolda bardy qalpyna keltirýdiń aýqymdy baǵdarlamasy jáne jylý júıelerin qaıta qurý jumystary bastalyp ketti. Alǵashqy oń ózgeristiń ıgiligin Kúrshim aýdany ortalyǵynyń turǵyndary kórdi. 81 jastaǵy Valentına Mýshankova qýanyshyn jasyrmady.
- Áıteýir degende qolymyz jetti ǵoı! Kómir tasyp, kúl shyǵarýdyń qıyndyǵyn talaı jyl kórip keldik. Ásirese, áıelderge qıyn. Óz páterimniń ortalyq jylýǵa qosylǵanyna sene almaı turmyn. Ózim jalǵyz turamyn, pesh jaǵý qıyn. Byltyrǵy jyl da kúrshimdikter úshin jemisti boldy. 60 jyl kútken Buqtyrma arqyly ótetin kópir ashyldy, - dep zeınetker qýanyshymen bólisti.
Kúrshimdegi qazandyqtardy qalpyna keltirý tek turǵyn úılerdi ǵana jylýmen qamtamasyz etip qana qoımaı, áleýmettik nysandardy da qamtyp otyr. Mysaly, № 4 mektep endi elektr qýatynyń óshýinen zardap shekpeıtin boldy, al jylýǵa ketetin shyǵyn úsh esege azaıdy.
- Kelesi jyly ortalyq jylý júıesine toǵyz úı jáne birneshe mekeme qosylmaq. Olardyń qatarynda aýdan ákimdigi de bar. Ázirge barlyq memlekettik uıymdar elektr júıesi arqyly jylynyp otyr. Qazandyqtardy qalpyna keltirý aýyl turǵyndarynyń ómirin jaqsartyp qana qoımaı, bıýdjettik uıymdardaǵy jylýǵa ketetin shyǵyndy azaıtady, - dedi jergilikti kommýnaldyq mekeme dırektory Aslan Aqanov.
Osyndaı jumystar Tavrııa, Samar, Aqjar eldimekenderinde de júrip jatyr. Tavrııada eki shaqyrym jylý júıesi tartylyp, 2025 jyly bloktik-modýldik qazandyqtyń qurylysy aıaqtalmaq. Samarda 31 úıdi, áleýmettik nysandardy jáne jeke sektorlardy qamtamasyz etetin jańa qazandyqtyń qurylysy bastalyp, jylý júıeleri de qalpyna keltiriledi.
- Aldaǵy ýaqytta 161 úıdi ortalyq jylý júıesine qosý kózdelgen. Ol 2400 páter jylýmen qamtamasyz etiledi degen sóz. Alaıda munyń bári iri kólemdegi ınvestıtsııany talap etedi. Jeti aýyldaǵy jylý júıelerin qalpyna keltirý jáne qazandyqtardy salýdyń ózine 20 mıllıard teńge qajet. Qarajat máselesin de aqyryndap sheshe bastaımyz, - dedi Nurlan Ramazanov.
Óńir turǵyndary bul jobalardyń júzege asýy jaıly ómir syılap qana qoımaı, jekelegen aýdandardan turǵyndardyń kóshýin toqtatady dep úmittenedi.
Eske salsaq, osyǵan deıin ShQO-da on jylda 30 aýyl kartadan ǵaıyp bolǵany jaıly jazǵan bolatynbyz.