ShQO-daǵy kompanııalardyń biri jer qoınaýyn zańsyz óńdep, 1 mlrd teńge tabys tapqan
ÓSKEMEN.KAZINFORM - Shyǵys Qazaqstan oblysy Shemonaıha aýdanynda ornalasqan «Glınkovskoe» ken ornynda JShS basshysy paıdaly qatty qazbalardy zańsyz óndirý men ótkizýdi uıymdastyrǵan.
QR Qarjylyq monıtorıng agenttigi baspasóz qyzmetiniń habarlaýynsha, kompanııanyń lıtsenzııasy tek geologııalyq barlaý jumystaryn júrgizýge ǵana jaraıdy, paıdaly qazbalardy ónerkásiptik kólemde óndirýge ruqsat bolmaǵan.
Soǵan qaramastan, is júzinde temir quramdy taý jynysyn óndirý, ony qaıta óńdeý, jınaqtaý jáne ishki naryqta, sondaı-aq Qytaı Halyq Respýblıkasyna ótkizý jumystary júrgizilgen. Aýyr arnaıy tehnıkany qoldaný qorshaǵan ortaǵa teris áser etip, jer bederiniń tabıǵı qalpynyń buzylýyna jáne jerdiń tozýyna ákep soqqan.
Zańsyz óndirilgen ónimniń jalpy kólemi 70 myń tonnadan asqan. Alynǵan qylmystyq tabys somasy 1 mlrd teńgeden asqan. Atalǵan qarajatqa kúdiktiler jyljymaly jáne jyljymaıtyn múlik: bıznes-ortalyq, Almaty qalasyndaǵy páter, «LAND ROVER RANGE ROVER» markaly avtokólik, 2 avtoturaq orny jáne 2 jer telim satyp alǵan. Sot sanktsııasymen atalǵan múlikke tyıym salyndy.
Aıta keteıik, buǵan deıin Departament Shyǵys Qazaqstan oblysynyń Ulan aýdany aýmaǵyndaǵy «Shybyndy» jáne Samar aýdanynyń «Kenkaryn» ýchaskelerinde aýyr arnaıy tehnıka men ónerkásiptik jabdyqtardy paıdalana otyryp, altyndy zańsyz óndirýmen aınalysqan eki qylmystyq toptyń qyzmetin toqtatqan.
Atalǵan zańsyz áreketter orman alqaptarynyń kesilýine, ózen arnalarynyń ózgerýine jáne topyraqtyń qunarly qabatynyń joıylýyna ákelip, ekologııaǵa eleýli zııan keltirgen.
Zańsyz ken óndirýdi toqtatý tabıǵı ortanyń odan ári búlinýiniń aldyn alyp, óńirdiń ekologııalyq qaýipsizdigine tóngen qaterdi joıýǵa múmkindik berdi.
Osyǵan deıin Qarjylyq monıtorıng agenttigi 150 myńǵa jýyq aktsızsiz temeki satýshylardy quryqtaǵany týraly jazdyq.