ShQO-daǵy keı kásiporyndar shyǵaryndylar týraly derekterdi onlaın jibermeı otyr
ÓSKEMEN. KAZINFORM – Shyǵys Qazaqstan oblysynda avtomattandyrylǵan rejımde shyǵaryndylardy baqylaýǵa mindetti alty iri kásiporyn áli kúnge deıin tıisti monıtorıng júıelerin engizbegen.
Keı nysandarda buǵan qarjylandyrýdyń joqtyǵy sebep bolsa, endi birinde qaıta jańǵyrtý jumystary men jobalyq qujattamany ázirleý áli jalǵasyp jatyr.
ShQO Ekologııa departamenti basshysynyń mindetin atqarýshy Áset Súleımenovtiń aıtýynsha, jylyna 500 tonnadan astam lastaýshy zat shyǵaratyn 21 kásiporynda avtomattandyrylǵan monıtorıng júıesi jumys isteýi tıis.
Búginde mundaı júıeler 15 kásiporynda ornatylǵan. Onyń ishindegi 13-i qorshaǵan orta jónindegi Ulttyq derekter bankine málimetterdi turaqty túrde joldap otyr. Al «Óskemen Vodokanal» ShJQ KMK men «Vostokenergo Ýst-Talovka» JShS-de jabdyqtar ornatylǵanymen, iske qosý-baptaý jumystary aıaqtalmaǵandyqtan, ázirge aqparat berilmeı otyr.
– Avtomattandyrylǵan monıtorıng júıesi áli engizilmegen alty kásiporynnyń tórteýi kommýnaldyq menshikke jatady. Barlyq nysandarǵa tekserý júrgizildi. Keıbirinde obektıvti sebepter bolsa, endi birinde belgilengen merzimderdiń saqtalmaýyna qatysty máseleler bar, – dedi Áset Súleımenov.
Máselen, «Aıtas-energo» JShS monıtorıng júıesin ýaqtyly ornatpaǵany úshin ákimshilik jaýapkershilikke tartylǵan. Qazirgi ýaqytta jobalyq-smetalyq qujattama daıyndalyp, qarjylandyrý máselesin sheshý úshin Ulan aýdany ákimdigine joldanǵan.
Sondaı-aq «Vostokmashzavod» kásipornynda da avtomattandyrylǵan monıtorıng júıesi áli ornatylmady. Buǵan deıin kásiporyn ekologııalyq zańnamany buzǵany úshin jaýapkershilikke tartylǵanymen, júıeni engizý jóninde túpkilikti sheshim qabyldanbaǵan.
Qarjylandyrý máselesi Altaı qalasynyń «Jylý sý ortalyǵy» kommýnaldyq kásipornynda da sheshimin kútýde. Tıisti bıýdjettik ótinim berilgen.
Taǵy eki nysanda jumystar jalǵasyp jatyr. Rıdder jylý elektr ortalyǵynda avtomattandyrylǵan monıtorıng júıesiniń jobasyn ázirleýge kelisimshart jasalǵan. Ortalyq «Shyǵys Jylý» AQ qaramaǵyna ótkennen jáne tarıf bekitilgennen keıin júıeni ornatý josparlanyp otyr.
Osy syndy jumystar Óskemendegi «Shyǵys Jylý» AQ nysandarynda da júrgizilip keledi. Joba qazirgi ýaqytta memlekettik saraptamadan ótip jatyr jáne №2 qalalyq qazandyqty qaıta jańǵyrtý ári keńeıtý jumystarymen qatar júzege asyrylmaq.
Ekologııa departamentiniń málimetinshe, avtomattandyrylǵan monıtorıng júıeleri óndiristik shyǵaryndylar kólemin naqty ýaqyt rejıminde baqylaýǵa múmkindik beredi jáne iri kásiporyndardyń ekologııalyq talaptardy saqtaýyna turaqty baqylaý júrgizýdi qamtamasyz etedi.
Eske salsaq, osyǵan deıin ShQO-da bıyl abattandyrý qaǵıdalary 5 myńnan astam ret buzylǵany habarlanǵan.
