ShQO-daǵy kent turǵyndary úılerine jylý berilmeı jatqandyǵyna shaǵymdandy
ÓSKEMEN. KAZINFORM – Glýbokoe aýdany Beloýsovka kentiniń turǵyndary úılerine áli jylý berilmegenine shaǵymdandy. Kún sýyp ketkendikten keshke qaraı úıde dirdektep tońyp otyratyndaryn aıtty. Kazinform tilshisine máseleniń mánisine úńilip kórgen edi.
Beloýsovka kentindegi Tsentralnaıa kóshesinde ornalasqan kópqabatty úıde turatyn halyq qazan aıynyń basynda kún sýytyp ketkendikten jylý berile me, dep úmittengen. Alaıda bul úmitteri aqtalmapty.
«Áli kúnge jylý berilgen joq. Keshke jumystan úıge kelgende qalyń kıimimizdi sheshpeımiz. Uıyqtaǵanda da birneshe kórpeni oranyp alyp jatamyz. Ákimdikke habarlasyp ta kórdik. Jylýdy qosamyz degen. Biraq áli kúnge deıin qospady», - dedi aty-jónin atamaýdy suraǵan kóshe turǵyny.
Turǵyndar Kazinform redaktsııasyna 7 qazan kúni habarlasqan bolatyn. Anyq-qanyǵyn bilý úshin aýdan ákimdigine resmı saýalhat joldadyq.
«Aýdan ákimdiginiń 30 qyrkúıektegi №461 qaýlysyna sáıkes, Glýbokoe kentinde ortalyq jylýmen jabdyqtalatyn obektilerdiń jylytý maýsymy 4 qazannan, Beloýsovka kentinde jáne Altaı aýylynda 1 qazannan bastaldy. Avtonomdy qazandyqtarmen, elektr qazandyqtarymen jáne qatty otynmen jylytylatyn áleýmettik maqsattaǵy obektiler men kásiporyndarda jylytý maýsymy 1 qazanda bastalǵan. Al kóppáterli turǵyn úıler, áleýmettik nysandar jáne jylý energııasyn qabyldaýǵa daıyn uıymdar jumys tártibimen ortalyqtandyrylǵan jylýmen jabdyqtaý jelilerine qosylǵan», - dep jaýap berdi Glýbokoe aýdany ákiminiń orynbasary Aıan Makıev.
Tsentralnaıa kóshesi, 1 mekenjaıyndaǵy kópqabatty úıdiń daıyndyq pasporty bolmaǵan. Dese de 10 qazan kúni daıyndyq jumystary aıaqtalyp, úıge jylý berilipti.
Ákimdiktiń jaýabyn alǵan soń kóshe turǵyndaryna qaıta habarlasyp kórdik.
«Iá, jylý berildi. Biraq batareıalarymyz áli salqyn bolyp tur. Aıtyp edik, batareıalardan sý túsirip jatqandaryn, sosyn jylıtyndyǵyn jetkizdi. Kútip otyrmyz», - dep jaýap berdi.
Aıta keteıik, Glýbokoe aýdanynyń halqy úshin jylytý maýsymynda jalpy kómir qajettiligi 53 myń tonnany quraıdy. Búgingi tańda turǵyndar 50 350 tonna (95%) kómir satyp alǵan.
ShQO-da qys kezinde jolda qalǵandar úshin 10 jylytý pýnkti jumys isteıtinin jazdyq.
