ShQO-daǵy ken ornynan shahta sýyn zańsyz tógý faktisi anyqtaldy
ÓSKEMEN. KAZINFORM — Shyǵys Qazaqstan oblysy Glýbokoe aýdanyndaǵy Verhneberezovskıı aýylynda qytaılyq Dengbo Success Minerals Ltd kompanııasy ıgerýdi josparlap otyrǵan Novo-Berezov ken orny aýmaǵynan shahta sýyn zańsyz tógý toqtatyldy.
Tabıǵatty qorǵaý prokýratýrasy jaǵdaıdy baqylaýǵa aldy. Al ShQO Ekologııa departamenti jospardan tys tekserý júrgizýge daıyndalyp jatyr.
Buǵan áleýmettik jelide taraǵan vıdeo sebep bolǵan. Kadrlarda sý aǵyny kóbik jáne sarǵysh tústi shógindiler kórinedi. Aýyl turǵyndary jer betine naqty ne tógilgenin jáne sýdyń qaıdan kelip jatqanyn anyqtaýdy talap etti.
ShQO Ekologııa departamenti basshysynyń mindetin atqarýshy Áset Súleımenovtiń aıtýynsha, kompanııa buǵan deıin shahta sýyn soryp shyǵarý máselesi boıynsha júgingen. Alaıda olarǵa sýdy tógýge ruqsat berilmegen.
— Investorlar departamentke kelip, shahta sýyn soryp shyǵaratynyn aıtty. Biz olarǵa shahta sýyn tóger aldynda zııandy qospalardan normatıvterge deıin tazartý qajet ekenin túsindirdik. Olar tıisti qujattamany ázirleýge kiristi. Bizden sýdy tógýge ekologııalyq ruqsat alǵan joq. Keıin áleýmettik jelilerde osyndaı vıdeo tarady. Investorlar nasostardy óz betinshe ornatyp, sýdy soryp shyǵara bastaǵany anyqtaldy, — dedi Áset Súleımenov.
Onyń aıtýynsha, shahta sýynyń tógilýi týraly aqparat taraǵannan keıin jaǵdaıǵa quqyq qorǵaý organdary da aralasqan.
— Prokýratýra jaǵdaıdy baqylaýǵa aldy. Osydan keıin nasostar alynyp tastaldy. Qazir jospardan tys tekserýdi tirkep jatyrmyz. Jaqyn arada oqıǵa ornyna baramyz. Tekserý qorytyndysy boıynsha shahta sýyn zańsyz tógý faktisi anyqtalsa, olardy ákimshilik jaýapkershilikke tartamyz, — dedi departament basshysynyń mindetin atqarýshy.
Sýdyń quramynda qandaı da bir lastaýshy zattardyń bar-joǵy ázirge anyqtalǵan joq.
Eske salsaq, osyǵan deıin SQO-da aǵyn sýdy zańsyz aǵyzǵan kásiporynǵa 174 mln teńge aıyppul salynǵanyn jazǵanbyz.
