ShQO-daǵy kásiporynǵa salynǵan 4 mlrd teńgeniń aıyppuly alynyp tastaldy

ÓSKEMEN. KAZINFORM – Óskemendegi «Vostokmashzavod» kásiporny 4 mlrd teńge kólemindegi aıyppul tóleýden bosatyldy.

Bas kólik prokýratýrasynyń málimetinshe, zaýyttaǵy vagondardyń bos turyp qalýyna baılanysty salynǵan aıyppuldar zańsyz dep tanylǵan.

Bul daýly másele 2022 jyldan beri sozylyp kelgen. «QTJ-Júk tasymaly» JShS kásiporynǵa vagondardyń toqtap qalýyna baılanysty aıyppul salǵan. Alaıda prokýrorlar «Vostokmashzavod» bul tasymal protsesinde júk jóneltýshi de, júk alýshy da, vagon ne temirjol ıesi de bolmaǵanyn anyqtady.

– «Temirjol kóligi týraly» Zańnyń 49-baby 2-tarmaǵyna sáıkes, mundaı mindetti tólemder naqty tasymalǵa qatysýshy taraptarǵa ǵana júkteledi. Al «Vostokmashzavod» olardyń qataryna kirmeıdi, – dep habarlady Bas kólik prokýratýrasynyń baspasóz qyzmetinen.

Prokýrorlardyń aralasýy nátıjesinde kásiporynǵa zańsyz salynǵan 4 mıllıard teńge kólemindegi aıyppul alynyp tastaldy.

Eske salsaq, osyǵan deıin 2027 jylǵa deıin 5 myń shaqyrym temirjol salynyp, jańǵyrtylatyndyǵy habarlanǵan.