ShQO-daǵy kásiporyndardyń jumysshylarǵa qaryzy 60 mln teńgeden asady
ÓSKEMEN. KAZINFORM – Shyǵys Qazaqstan oblysyndaǵy kásiporyndardyń jumysshylarǵa eńbekaqy boıynsha bereshegi 60 mln teńgeden asady.
Óńirdegi 39 kásiporynnyń 532 qyzmetkerge jalaqyny ýaqytyly tólemeı kele jatqany anyqtaldy. Bul týraly ShQO memlekettik eńbek ınspektsııasy basqarmasynyń basshysy Baqytbek Qızatov málim etti.
«Osy jyldyń basynda kásiporyndardyń jumysshylarǵa qaryzy 327,1 mln teńgeni quraǵan. Qazan aıyna deıin osy bereshektiń 262,3 mln teńgesi jabyldy. Biraq áli de jalaqy boıynsha qaryz 60 mln teńgeden asyp otyr», - deıdi ol.
Qazirgi ýaqytta eńbek ınspektorlary zııandy ortada jumys isteıtin qyzmetkerlerdiń eńbek kitapshasyn tsıfrlandyrý jáne elektrondy eńbek sharttaryn HR Enbek júıesine tirkeý boıynsha jumystardy júrgizip jatyr.
«Óndiristegi jaraqattaný deńgeıi ótken jylmen salystyrǵanda 7,3%-ǵa tómendedi. Jumysshylardy jazataıym oqıǵalardan saqtandyrý boıynsha jasalǵan sharttardyń jalpy úlesi belsendi kásiporyndar sanynyń 65,1%-yn quraıdy», - deıdi Baqytbek Qızatov.
Aıta keteıik, 2024 jyldyń toǵyz aıynda memlekettik eńbek ınspektsııasy basqarmasy jeke jáne zańdy tulǵalardan túsken 1460 ótinishti qarady. Al ótken jyldyń sáıkes kezeńindegi ótinishter sany - 1139.
