ShQO-daǵy Qandysý sý qoımasyn jóndeýge 10 mln teńge bólindi

ÓSKEMEN. KAZINFORM – Shyǵys Qazaqstan oblysyndaǵy Qandysý sý qoımasyn jóndeýge jobalyq-smetalyq qujattama daıyndaý úshin 10 mln teńge bólindi.

Bul týraly QR Sý resýrstary jáne ırrıgatsııa mınıstrligi Sý sharýashylyǵy komıteti «Qazsýshar» sharýashylyq júrgizý quqyǵyndaǵy ShQO fılıalynyń dırektory Nurjan Ámirjanov málim etti.

«Mekeme teńgeriminde 118 jalpy sý sharýashylyq obektisi, onyń ishinde jeti sý qoımasy bar. Atap aıtsaq, Úıdene, Qandysý, orta Terekti, Alebastr jáne Abaı oblysyna qarasty Shar, Qaraqol sý qoımalary. Kóktemgi ýaqytta ózen arnalary tolyp ketpes úshin sý qoımalarynan sý aǵýyn retteý jumystary júrgizilip otyrdy. Innertti materıaldar men ydys-qaptar qory ýaqytyly daıyndaldy. Sonyń nátıjesinde, bıyl sý tasqyny qaýpi joǵary kezeńde oblys boıynsha birde-bir úıdi sý almady», – dedi ol.

Osy rette, kópti tolǵandyrǵan saýaldardyń biri – Tarbaǵataı aýdany aýmaǵyndaǵy Qandysý sý qoımasynyń qashan jóndeletini. Nurjan Ámirjanovtyń aıtýynsha, osy maqsatta qarajat ta bólingen.

«Bıyl sý qoımasyn jóndeýge respýblıkalyq bıýdjetten jobalyq-smetalyq qujattama daıyndaý úshin 10 mln teńge bólindi. Qazirgi kezde sý sharýashylyǵy komıteti sheńberinde merdigerdi anyqtaý úshin konkýrstyq rásimder ótkizildi. Kelisimshartqa qol qoıylǵan», - dedi fılıal dırektory.

Jobalyq-smetalyq qujattamany ázirleý bıyl aıaqtalyp, keler jyldan bastap sý qoımasynda qurylys-montajdaý jumystaryna qajetti qarjy jumyldyrylady dep josparlanǵan.