ShQO-daǵy halyqaralyq festıvalde 40 tazy, 40 búrkit pen 10 suńqar jarys jolyna tústi
Shyǵys Qazaqstan oblysy Ulan aýdanynda «Shyǵys salbýryny - 2023» halyqaralyq festıvali ótti, dep habarlaıdy Kazinform.
Oblys ákimdiginiń málimetine súıensek, festıval Ulan aýdany Bozanbaı aýylyndaǵy «Búrkit tóbe» ıppodromynda úshinshi jyl qatarynan ótkizilip otyr.
Bıyl týrnırge Qazaqstannan bólek Qytaı, Mońǵolııa, Reseı jáne Qyrǵyzstannan qatysýshylar keldi.
Qazylar alqasy kórermenmen birge 40 búrkit pen 10 suńqardyń arasynan jáne ıt jarysy boıynsha 40 tazy tuqymdylardyń arasynan úzdikterdi anyqtady.
«Ejelgi zamannan beri quspen ań aýlaý óneri qazaq halqynyń salt-dástúri men turmysyna myqtap engen. Al qazirgi kezde mundaı jarystardy ótkizý qoǵamnyń osy ulttyq sport túrlerine degen qyzyǵýshylyǵyn arttyrýǵa yqpal etedi. Búrkitter men suńqarlar, basqa da ań aýlaıtyn qustar — bizdiń ejelgi tarıhymyzdyń tiri kýágerleri jáne jolserikteri» — dedi Shyǵys Qazaqstan oblysynyń ákimi Ermek Kósherbaev.
Іrikteý kezeńinde jyrtqysh qustar 700 metr qashyqtyqtan ıesiniń shaqyrýymen ushyp, qyrandar shyrǵa salýdan synǵa tústi.
Jartylaı fınalda qoıandardy erkin aýlaý boldy. Al fınal — túlki aýlaýdan ótkizildi.
Qorytyndy baǵdarlamada ıesiniń shaqyrýymen qarshyǵanyń, suńqardyń, búrkittiń ushýy jáne ushqan kezde ıtelgini shyrǵaǵa salýy, búrkittiń túlki, qoıan aýlaýy, suńqar men qarshyǵanyń kógershin aýlaýy ótkizildi.
Festıvaldiń ereksheligi — qazaqy tazylardyń 1000 metrge júgirýi jáne asaý jylqylardy qolǵa úıretý.
«Nátıjesinde almatylyq Almas Seıitjan týrnırdiń úzdik búrkitshisi atandy. Ekinshi jáne úshinshi oryndardy Jambyl oblysynyń ókilderi Serikbolsyn Jalǵasuly men Bolat Nurdos ıelendi. Rıdder búrkitshisi Jumaǵul Ersultan 4-shi oryn aldy. Almaty oblysynan Murat Kodenov úzdik bestikti túıindedi», — delingen aqparatta.
Qarshyǵa saıysynda shyǵysqazaqstandyqtar jeńimpaz atandy: Ǵalym Samǵat (1 oryn) jáne Baıetbaı Ermuhan (2 oryn).
Úshinshi oryn Almaty oblysynan kelgen Seıitjan Aıanǵa buıyrsa, 4-shi oryndy Reseıden kelgen Konstantın Tıhonov ıelendi.
Suńqarlar arasyndaǵy jarysty Túrkistan oblysynan Eran Sandybaı jeńip aldy. 2-orynǵa qaraǵandylyq Temiráli Tólegenuly, 3-orynǵa astanalyq Erasyl Serikbekuly ıe boldy.
Tazy jarysynda «Shasha» atty tazy ıt úzdik atandy (ıesi Nurlan Tileýjanov, Jetisý oblysy Sarqan qalasy).
2-oryn «Lashyn» atty tazyǵa berildi (ıesi Meıir Jetpisov, ShQO Tarbaǵataı aýdany).
Al úshinshi oryn «Kók qasqa» atty tazy ıtke tıesili boldy (ıesi Temirlan Azızov, ShQO Zaısan aýdany).
Asaý úıretý boıynsha Ulan aýdany Bozanbaı aýylynyń turǵyndary Manat Aqjol (1-oryn), Marks Aqjan (2-oryn), Janbolat Seıit (3-oryn) alyp, asaý jylqyny baǵyndyra biletin eń jaqsy atbegiler ekenin kórsetti.
Týrnır jeńimpazdary men júldegerlerine kýboktar men aqshalaı syılyqtar tabystaldy.
