ShQO-daǵy Glýbokoe jáne Shemonaıha aýdandarynda jumys ýaqyty endi saǵat 8-de bastalady

ÓSKEMEN. KAZINFORM – Shyǵys Qazaqstan oblysyndaǵy Glýbokoe jáne Shemonaıha aýdandarynda jumys ýaqyty bir saǵatqa shegerildi.

Osy ýaqytqa deıin óńirdegi Katonqaraǵaı, Zaısan, Tarbaǵataı, Ulan, Kúrshim, Marqakól, Samar, Úlken Naryn jáne Altaı aýdandary jańa jumys kestesine kóshken. Endi bul qatarǵa Glýbokoe jáne Shemonaıha aýdandary qosylyp otyr.

Demek, Shyǵys Qazaqstandaǵy 11 aýdanda memlekettik mekemeler, kásiporyndar jáne áleýmettik qyzmetter úshin jumys kúni tańǵy 08:00-de bastalyp, keshki 17:30-da aıaqtalady. Túski úzilis 12:00-den 13:30-ǵa deıin.

Alaıda bul ózgerister bilim berý mekemelerine, balabaqshalar men medıtsınalyq uıymdarǵa áser etpeıdi. Sebebi olar burynnan osyndaı tártipte jumys istep keledi.

Shemonaıha aýdanynyń ákimi Dıdar Keńesbaev jańa ózgerister belgili bir qolaısyzdyqtar týdyrýy múmkindigin, biraq bul aýdannyń damýy úshin qajet ekenin jetkizdi.

– Ýaqyt beldeýiniń ózgerýine baılanysty jańa jaǵdaılarǵa beıimdelý qajettiligi týyndady. Jumys kestesiniń ózgerýine beıimdeletin barlyq bıýdjet qyzmetkerlerine qoldaý bildiremin. Bul – jumys úderisterin ońtaılandyrýǵa jáne áleýmettik, kommýnaldyq mekemelerdiń úzdiksiz jumysyn qamtamasyz etýge baǵyttalǵan qadam. Biz jaǵdaıdy muqııat qadaǵalap, týyndaǵan suraqtar men usynystarǵa jedel jaýap beremiz, – dedi ol.

Eske salsaq, buǵan deıin Katonqaraǵaı aýdanynda jumys ýaqyty bir saǵatqa keri shegerilgeni habarlanǵan.

Keıin taǵy birneshe aýdanda jumys ýaqyty ózgertildi.

Al keshe Altaı jáne Ulan aýdandarynda da jumys ýaqyty saǵat 08.00-de bastalatyndyǵy habarlandy.