ShQO-daǵy eń bıik taýly kópirdiń qurylysyn jańa merdiger júrgizedi
ÓSKEMEN. KAZINFORM – Shyǵys Qazaqstan oblysyndaǵy Osınov asýyn aınalyp ótetin jol jobasyn endi Buqtyrma sý qoımasyndaǵy elimizdegi eń uzyn kópirdi salǵan «OblShyǵysJol» JShS aıaqtaıdy.
Joba aıasynda Pıhtovka shatqaly arqyly ótetin Qazaqstandaǵy eń bıik taýly kópirdiń qurylysy júrgizilip jatyr. Bul joba óńirdegi eń kúrdeli ári uzaqqa sozylǵan jol qurylystarynyń birine aınalǵan. Osınov asýyn aınalyp ótetin jańa jol Altaı, Úlken Naryn, Katonqaraǵaı aýdandary turǵyndary men Rahman qaınaryna baratyn týrıster úshin mańyzdy baǵyt bolmaq.
Jańa trassa joldy shamamen tórt shaqyrymǵa qysqartyp, qozǵalys qaýipsizdigin arttyrady. Qazirgi jolda qys mezgilinde qar kóshkini men boran saldarynan shekteýler jıi engiziledi.
Buǵan deıin qurylysty júrgizgen «Kurylys Group RK» kompanııasymen kelisimshart merzimniń keshigýine baılanysty buzylǵan. «QazAvtoJol» málimetinshe, merdiger jumys kestesin birneshe ret buzyp, jobany aıaqtaý merzimin saqtamady. Keıin kompanııa memlekettik satyp alýdyń josyqsyz qatysýshylary tizimine engizildi.
– Qazirgi tańda jańa merdiger qurylys alańyna tehnıka men mamandardy tolyq jumyldyrǵan. Kópir mańynda beton zaýyty ornatylyp, beton jumystarynyń jartysyna jýyǵy aıaqtalǵan. Negizgi jumystardy tamyz aıynyń sońyna deıin bitirý josparlanyp otyr, - deıdi «QazAvtoJol» AQ Shyǵys Qazaqstan oblysy boıynsha fılıalynyń dırektory Nurbek Temirhanov.
Mamandardyń aıtýynsha, nysandaǵy ár kezeń sapa baqylaýynan ótedi. Zerthanalyq tekserýler turaqty júrgizilip, anyqtalǵan kemshilikter merdiger esebinen túzetiledi. Eger qurylys kestege saı júrse, Osınov asýyn aınalyp ótetin jańa jol bıyl paıdalanýǵa beriledi dep josparlanyp otyr.
Eske salsaq, ShQO-da qurylysy «jyr» bolǵan Osınov asýyndaǵy jol 2024 jyly qaıta salyna bastaǵan bolatyn.
