ShQO-daǵy eń bıik kópirlerdiń biriniń qurylysy aıaqtaldy
ASTANA. KAZINFORM – «QazAvtoJol» Shyǵys Qazaqstandaǵy eń bıik kópirlerdiń biriniń qurylysyn aıaqtaǵanyn habarlady.
Shyǵys Qazaqstan oblysynda Pıhtovka ózeni arqyly ótetin, óńirdegi eń kúrdeli ári aýqymdy kópir nysandarynyń biri salyndy. Bıiktigi 45 metrge deıin jetetin kópirdiń uzyndyǵy – 175 metr.
– «QazAvtoJol» UK» AQ Rahman qaınarlaryna aparatyn baǵyttaǵy Pıhtovka ózeni arqyly ótetin kópir qurylysynyń negizgi kezeńin aıaqtady. Qurylystyń sheshýshi sáti – kópirdiń sońǵy, jetinshi aralyq qurylymyn ornatý boldy. Osylaısha jańa kópir tereń taý shatqalynyń eki jaǵasyn tolyq jalǵady, - delingen habarlamada.
Uzyndyǵy 175 metrlik kópir jer bederinen 45 metrge deıingi bıiktikte ornalasqan. Qurylym árqaısysynyń uzyndyǵy 24 metr bolatyn jeti aralyqtan jáne segiz tirekten turady. Onyń ekeýi – jaǵalyq, altaýy – aralyq tirek. Búginde segiz tirektiń barlyǵy tolyq turǵyzylyp, jeti aralyq qurylymdy montajdaý aıaqtaldy.
Osylaısha Shyǵys Qazaqstandaǵy tehnıkalyq turǵydan eń kúrdeli kópir nysandarynyń birindegi negizgi qurylys jumystary máresine jetti.
– Búgin – biz úshin erekshe kún. Pıhtovka ózeni arqyly ótetin kópir qurylysynyń aıaqtalýy – úlken ujymnyń qajyrly eńbeginiń nátıjesi. Nysan kúrdeli taýly jerde salyndy. Munda árbir ınjenerlik sheshim asa joǵary dáldik pen jaýapkershilikti talap etti. Osy 175 metr kópirdiń artynda ınjenerlerimizdiń, qurylysshylarymyzdyń jáne jobaǵa qatysqan barlyq mamannyń birneshe aıǵa sozylǵan tynymsyz eńbegi tur. Shyǵys Qazaqstannyń osyndaı kúrdeli jer bederinde aýqymdy jobany júzege asyrǵanymyzdy maqtan tutamyz, – dedi «QazAvtoJol» UK» AQ Shyǵys Qazaqstan oblystyq fılıalynyń dırektory Nurbek Temirhanov.
Kópir qurylysy kúrdeli taýly jerde júrgizildi. Qurylysshylarǵa iri konstrýktsııalardy aıtarlyqtaı bıiktikte asa dáldikpen ornatý, qurylys materıaldaryn jetkizý jáne aýyr tehnıkanyń jetýi qıyn aýmaqta úzdiksiz jumys isteýin qamtamasyz etý mindeti qoıyldy. Nysanda 150-ge jýyq maman, arnaıy qurylys tehnıkasy men jabdyqtar jumys istedi. Beton jumystaryn úzdiksiz júrgizý úshin qurylys alańynda jyljymaly beton zaýyty iske qosyldy.
Syrt kózge yqsham kórinetin kópir konstrýktsııasynyń artynda kúrdeli ınjenerlik jumys jatyr. Ár tirekti turǵyzý men ár aralyqty ornatý naqty esepti, tehnologııalyq jumystardyń qatań retin jáne ınjenerler, kópir salýshylar men jolshylardyń úılesimdi eńbegin talap etti. Qazir nysanda sońǵy jumystar atqarylyp jatyr. Beton tuǵyrlar men qorshaýlar ornatylyp, parapetter montajdalyp jatyr.
Sondaı-aq betkeıler «Reno» matrastary jáne gabıon konstrýktsııalary arqyly nyǵaıtylyp, qozǵalys qaýipsizdigin qamtamasyz etý sharalary júrgizilip jatyr.
Kópirdiń júrý bóligine asfaltbeton jamylǵysyn qyrkúıek aıynyń sońyna deıin tóseý josparlanǵan. Qalǵan jumystar men qaýipsizdik sharalary tolyq aıaqtalǵannan keıin kópir kólik qozǵalysyn ashýǵa daıyn bolady. Pıhtovka ózeni arqyly salynǵan kópirdiń Shyǵys Qazaqstan úshin mańyzy erekshe. Bıiktigi kópqabatty úımen shamalas alyp qurylys osydan birneshe jyl buryn kúrdeli taý bederi kólik qatynasyn aıtarlyqtaı shektegen jerde boı kóterdi. Jańa kópir – mańyzdy ınfraqurylym nysany ǵana emes, otandyq jol salasynyń kúrdeli tabıǵı jaǵdaıda aýqymdy ınjenerlik jobalardy júzege asyra alatynyn kórsetetin nysan.
Jeti aralyq pen segiz tirektiń artynda birneshe aıǵa sozylǵan tynymsyz eńbek, júzdegen ınjenerlik sheshim jáne Shyǵys Qazaqstannyń taýly aımaǵynda jumys istegen mamandardyń mańdaı teri tur. Búgin sońǵy aralyq óz ornyna qoıyldy. Pıhtovkanyń eki jaǵasy jalǵandy.
Qyzylordada Syrdarııa arqyly ótetin jańa kópir salynatynyn jazǵan edik.
