ShQO-daǵy demalys bazasynda aspaly jolda tross úzilip, bir adam jaraqat aldy
ÓSKEMEN. KAZINFORM – Shyǵys Qazaqstan oblysy Altaı aýdanyndaǵy demalys bazasynda aspaly jolda tross úzildi. Sonyń saldarynan jattyǵýda júrgen jas sportshylardyń biri jaraqat aldy.
ShQO ákimdiginiń málimetine súıensek, oqıǵa búgin «Altaı alpisi» taý-shańǵy kýrortynda bolǵan. Aspaly jolda tross úzilip, jattyǵýda júrgen sportshylardyń biri ıyǵynan jaraqat aldy. Oqıǵa ornyna jedel járdem shaqyryldy.
«Aýyr jaraqat anyqtalmaǵanymen mamandar 2013 jyly týǵan sportshyny tolyq medıtsınalyq tekserý úshin Óskemen qalasyndaǵy Ana men bala ortalyǵyna alyp ketti. Oqıǵa ornyna quqyq qorǵaý organdarynyń ókilderi, Dene shynyqtyrý jáne sport basqarmasynyń qyzmetkerleri men Glýbokoe aýdanynyń ákimi Eldar Tumashınov keldi», - delingen aqparatta.
Tross úzilýiniń sebebin anyqtaý úshin arnaıy komıssııa quryldy. Másele oblys ákiminiń jeke baqylaýyna alynǵan.
Eske salsaq, osyǵan deıin Almaty oblysynda júk kóliginen ot shyǵyp, jolda salıýt atylǵany habarlanǵan.