ShQO-daǵy Buqtyrma sý qoımasynda synǵan paromnyń ornyna basqasy júrmek

ÓSKEMEN. KAZINFORM – Shyǵys Qazaqstan oblysyndaǵy Buqtyrma sý qoımasynda synǵan paromnyń ornyna basqasy júredi.

Samar men Kúrshim aýdandarynyń arasyn jalǵaıtyn «Qyzyl tý» parom ótkelinde tek bir parom júrip tur. Sebebi «Ertis» paromy synyp qalǵan bolatyn. Osy rette, ótkelde uzyn-sonar kezek qalyptaspas úshin ony Altaı aýdanyndaǵy «Odessa» paromy almastyrmaq. Bul týraly ShQO Jolaýshy kóligi jáne avtomobıl joldary basqarmasy basshysynyń jolaýshy kóligi máseleleri jónindegi orynbasary Aıjan Rahımbaeva aıtyp berdi.

«Búgingi tańda «Odessa» paromy tehnıkalyq turǵydan tolyqtaı jaramdy. Jumysshylar quramy jasaqtaldy. Navıgatsııalyq kezeńge qajetti barlyq jumys júrgizildi. Qazirde parom Altaıka aýylyndaǵy aralda tur. Ondaǵy muz jipsigen soń jolǵa shyǵady. Jol uzaqtyǵy – 12-14 saǵat aralyǵynda», - dedi ol.

Jospar boıynsha parom «Qyzyl tý» ótkelinde 27-28 sáýir kúnderi qatynaı bastaıdy.

Eske salsaq, buǵan deıin ShQO-da kópir salynyp jatqan Buqtyrma sý qoımasynda qatynaıtyn paromdardyń biri synyp qalǵany habarlanǵan.