ShQO-daǵy Buqtyrma sý qoımasynda eki áıel qutqaryldy
ASTANA. KAZINFORM – Shyǵys Qazaqstan oblysyndaǵy Buqtyrma sý qoımasynyń Soldat shyǵanaǵy mańynda qutqarýshylar qaıyqpen jaǵalaýǵa ózdiginen jete almaǵan eki áıelge kómek kórsetti. Bul týraly Tótenshe jaǵdaılar mınıstrligi habarlady.
112 qyzmetiniń pýltine Shyǵys Qazaqstan oblysy Altaı aýdanyndaǵy Soldat shyǵanaǵynda sýda oqıǵa bolǵany týraly habarlama kelip túsken.
Qaıyqta eki áıel bolǵan. Olar óz kúshterimen jaǵaǵa jete almaǵan.
– Oqıǵa ornyna jedel jetken TJM qutqarýshylary eki áıeldi jáne shaǵyn kólemdi qaıyqty jaǵaǵa aman-esen evakýatsııalady. Áıelderge medıtsınalyq kómek qajet bolǵan joq, – delingen mınıstrlik habarlamasynda.
Aıta keteıik, buǵan deıin Ulttyq ulan ofıtseri sýǵa batyp bara jatqan balany qutqaryp qalǵan bolatyn.
