ShQO-daǵy Buqtyrma ózeninde sý deńgeıi tómendep, qaýip seıildi
ÓSKEMEN. KAZINFORM — Shyǵys Qazaqstan oblysy Altaı aýdanynda sý tasqyny qaýpiniń beti qaıtty.
Eki kún boıy tolassyz jaýǵan jańbyrdan keıin Buqtyrma ózenindegi sý deńgeıi 608 santımetrden asyp ketken bolatyn. Sonyń saldarynan Zýbovsk kentinde 10 turǵyn jáne 3 turǵyn emes úıdiń aýlasyn sý basqan edi. TJD qyzmetkerleri men jergilikti atqarýshy organ mamandarynyń shuǵyl áreketteriniń nátıjesinde úılerge sý kirgen joq.
ShQO Tótenshe jaǵdaılar departamenti baspasóz qyzmetiniń málimetinshe, bógetti nyǵaıtý men turǵyn úılerdi qorǵaýǵa basa mán berilgen. Sol jerge myń tonnaǵa jýyq taý jynystary ákelinip, ydys-qap pen ınertti materıaldar tóseldi.
— 7,8 myń tekshe metrden astam sý soryldy. Bul jumys birden bastalyp ketkendikten, úılerge sý kirmedi. Turǵyndar úılerinen evakýatsııalanǵan joq, — deıdi departament bastyǵynyń orynbasary Amangeldi Eńsegenov.
Qazir Buqtyrmadaǵy sý deńgeıi tómendep, 535 santımetrdi qurap otyr. Jaǵdaı áli baqylaýda.
Eske salsaq, osyǵan deıin ShQO-daǵy Buqtyrma ózeninde sý deńgeıi kóterilip ketkeni habarlanǵan.