ShQO-daǵy Buqtyrma ózeninde sý deńgeıi kóterilip ketti
ÓSKEMEN. KAZINFORM – Shyǵys Qazaqstan oblysynda Buqtarma ózeniniń sý deńgeıiniń kóterilýi men Poganka ózenindegi jer asty sýlarynyń joǵarylaýynan úılerdi sý basý qaýpi týyndady.
30 sáýirden beri mol jaýyn-shashyn jaýyp, qardyń jyldam erýi Buqtyrma ózenindegi sýdyń synı deńgeıden asyp ketýine sebep boldy. Sonymen qatar Zýbovsk kentinde jer asty sýlarynyń kóterilýi saldarynan 10 turǵyn jáne 3 turǵyn emes úıdiń aýlasyn sý basty.
ShQO ákimi Nurymbet Saqtaǵanov Altaı aýdanyna bardy. Ol úılerdi sý basý qaýpi boıynsha jaǵdaımen tanysyp, qabyldanyp jatqan sharalardy tekserdi.
— Oblystyq TJD kúshterimen baqshalardan 4250 tekshe metr sý sorylyp, 2000 dana ydys-qap tóseldi. Qutqarýshylar men jergilikti atqarýshy organdardyń ýaqtyly jáne úılesimdi áreketteriniń arqasynda turǵyn úılerdi sý basýǵa jol berilgen joq. Bógetti nyǵaıtý úshin 980 tonna taý jynysy jetkizildi, 2000 dana qap daıyndalyp, drenaj ýchaskelerinde bógettiń ishki betine uzyndyǵy 60 metr polıetılen úldir tóseldi, — dep habarlady óńir ákiminiń baspasóz qyzmetinen.
Sý deńgeıine monıtorıng táýlik boıy júrgizilip jatyr. Halyqty evakýatsııalaý qajettiligi týyndaǵan joq. Qazir Buqtarma ózenindegi sý deńgeıi 73 sm-ge tómendep, 535 sm-di qurady. Qaýiptiń shegi artta qaldy. Sý tasqyny jaǵdaıy óńirlik shtabtyń turaqty baqylaýynda.
Eske salsaq, osyǵan deıin SQO-da tasqyn kezinde kvadrotsıklmen qap tasyǵan balanyń ata-anasyna aıyppul salynǵany habarlanǵan.