ShQO-daǵy Buqtyrma ózeninde birneshe jarylys jasaldy
ÓSKEMEN. KAZINFORM – Shyǵys Qazaqstan oblysyndaǵy Katonqaraǵaı aýdanynda jasandy jolmen qar kóshkini túsirilip, Buqtyrma ózeninde jarylys jasaldy.
Katonqaraǵaı aýdanynda qar kóshkininiń túsýine jol bermeý úshin taý betkeılerinde jarylys jasaldy. Sondaı-aq Buqtyrma ózeninde de muz keptelmes úshin jarylys jumystary júrgizildi.
- «Sogornoe-Barlyq» tasjolynyń boıynda barlyǵy 4770 tekshe metr qar túsirildi. Qar joldy tolyqtaı jaýyp qaldy. Kóp uzamaı qar tazartylyp, jol qaıta ashyldy. Al Buqtyrma ózeniniń Sennoe aýylynyń mańyndaǵy tusynda únemi muz keptelip, jaǵalaýdy sý basatyn. Soǵan baılanysty mamandar 10 myńǵa jýyq sharshy metr aýmaqta muzdy usaqtady, - delingen aqparatta.
Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.
Eske salsaq, buǵan deıin Shyǵys Qazaqstan oblysynda jasandy jolmen qar kóshkini júrgizilgeni habarlanǵan.