ShQO-da balabaqshadan 40 mln teńge jymqyrylǵan
ÓSKEMEN. KAZINFORM - Úlken Naryn aýdanynyń prokýratýrasy «Malonarym aýylynyń balabaqsha-bóbekjaıy» KMQK-da tekserý júrgizý barysynda balabaqsha esepshisiniń 3 jyl boıy óziniń jáne meńgerýshiniń shotyna artyq jalaqy somalaryn, sondaı-aq salyqtar men mindetti aýdarymdardy tóleýge arnalǵan qarajatty aýdaryp kelgenin anyqtady.
Uzaq ýaqyt boıy bilim berý mekemesiniń 18 qyzmetkeri úshin jeke tabys salyǵy, mindetti zeınetaqy jarnalary men áleýmettik aýdarymdar tólenbegen.
Jalpy alǵanda, balabaqsha meńgerýshisi men esepshisiniń shottaryna 42 mln teńgeden astam qarajat zańsyz aýdarylǵan.
Atalǵan fakti boıynsha aýdan prokýratýrasy sotqa deıingi tergep-tekserý amaldaryn bastady.
Qylmystyq-protsestik kodekstiń 201-babyna sáıkes, tergeý múddesindegi ózge aqparat jarııa etýge jatpaıdy.
Osyǵan deıin Jambyl oblysynda 108 mln teńge bıýdjet qarajatyn jymqyrý deregi anyqtalǵany týraly jazdyq.
