ShQO-daǵy aýyl halqy «Birqabatty Shyǵys» baǵdarlamasymen salynǵan úılerdiń sapasyzdyǵyna shaǵymdandy
ÓSKEMEN. KAZINFORM – Shyǵys Qazaqstan oblysy Glýbokoe aýdany Kojohovo aýylynda áleýmettik turǵyda osal sanattaǵy otbasylar ózderine berilgen úılerdiń sapasy syn kótermeıtinin aıtyp jatyr.
Olar «Birqabatty Shyǵys» baǵdarlamasy aıasynda salynǵan úıleriniń ishi sýyqtyǵyn, shatyrdyń ishine qar kiretinin, tipti esikteriniń qulap jatqanyn jetkizdi. Kazinform tilshisi máseleniń anyq-qanyǵyn bilip kórdi.
Iisi jaǵymsyz, qabyrǵalary juqa
Aqmaral Orazhanova 2024 jyldyń qazan aıynda kezegi kelip, úı alǵan. Biraq úıge birden emes, 2025 jyldyń qyrkúıek aıynda kóship kelipti.
- Kelgennen bastap áli kúnge deıin úıden septıktiń jaǵymsyz ıisi shyǵady. Úıdiń sapasyz salynǵany kórinip tur. Qarasha aıynda tipti syrtqy esik qulap tústi, - deıdi ol.
Kún sýyta bastaǵanda úıdiń ishin jylytý ońaı bolmaǵan. Bólmelerdiń ishi kógerip, terezelerdiń aldy sýlanyp, aıazda muz kirgen.
- Úıdiń kógerýi sol kúıi basylmady. Ol azdaı shatyrdyń ishine qar kirip, úıge sý aqty. «Birqabatty Shyǵys» baǵdarlamasymen salynǵan bul úılerde eki páter japsarlaı salynǵan. ıAǵnı, eki otbasy turady. Qabyrǵalary óte juqa bolǵandyqtan arǵy jaqtaǵy kórshiniń daýysy estilip turady. Balam jylasa álgi kórshim maǵan renjıdi. Sonda men ne isteý kerekpin? - deıdi Aqmaral Orazhanova.
Al kópbalaly ana Gaýhar Esqalıeva úı kezeginde 25 jyl boıy turǵan. Qazir memlekettik baǵdarlama arqyly satyp alý múmkindigimen jalǵa beriletin osy turǵyn úı úshin aıyna 17 myń teńge tólep turyp jatyr.
- Bul úıge 2024 jyly kóship keldik. Maǵan ákimdikten úıdi qabyldap alǵanyn rastaıtyn qujat ta berilmedi. Osy ýaqyt ishinde kúıeýim sapasy syn kótermeıtin úıdi jóndetýge birneshe ret óz esebinen aqsha tóledi. Ylǵal men kógerýdiń saldarynan jıhazdarymyz ben turmystyq tehnıkamyz qaıta-qaıta jaramsyz bolyp qalady. Balalar jıi aýyryp qalatyndyqtan, sabaqtan jıi qalýǵa májbúr, - deıdi ol.
Ákimdik ne deıdi?
Turǵyndar shaǵymyna jergilikti bıliktiń jaýabyn bilý úshin Shyǵys Qazaqstan oblysy ákimdigine habarlastyq.
- «Birqabatty Shyǵys» jobasy aıasynda salynǵan úılerdiń turǵyndaryn 2026 jyldyń aqpan aıynda Shyǵys Qazaqstan oblysynyń ákimi Nurymbet Saqtaǵanov jeke qabyldaǵan bolatyn. Kezdesý qorytyndysy boıynsha aımaq basshysy Kojohovo aýylynda sapasyz salynǵan úılerdi paıdalanýǵa qabyldaǵan laýazymdy tulǵalardyń tártiptik jaýapkershiligin qaraý jóninde tapsyrma berdi, - dep jaýap berdi oblys ákiminiń baspasóz qyzmetinen.
Merdiger mekeme anyqtalǵan aqaýlardy aýa raıy qolaıly bolǵan kezde joıýǵa jáne atqarylyp jatqan jumystar barysy týraly oblys ákimin jeke habardar etip otyrýǵa mindet alǵan.
- Kemshilikterdi joıý barysyn baqylaý ShQO memlekettik sáýlet-qurylys baqylaý basqarmasyna júkteldi. Oblys ákimi orynbasarynyń jetekshiligimen jumys toby quryldy. Qazirgi ýaqytta qurylys jumystaryna tekserý júrgizilip jatyr. Aqaýlar tolyq joıylǵannan keıin, osy jyldyń mamyr aıyna qaraı aımaq basshysy Kojohovo aýylyndaǵy úılerge arnaıy barady. Qazirgi basty mindet - halyqqa úılerde sapaly ári qaýipsiz turýyna jaǵdaı jasaý. Bul baǵyttaǵy jumystar jalǵasyp jatyr, - delingen vedomstvo jaýabynda.
Eske salsaq, osyǵan deıin Túrkistanda qoǵamdyq monshanyń sapasyz qurylysy týraly vıdeo taraǵany jaıly jazǵanbyz.