ShQO-daǵy asfalt-beton zaýytynda shań shyǵaryndylary normadan 41 ese asyp ketken
ÓSKEMEN. KAZINFORM – Shyǵys Qazaqstan oblysyndaǵy birqatar kásiporynda shań shyǵaryndylarynyń belgilengen normadan 41 ese asyp ketkenin, ekologııalyq ruqsatsyz jumys isteý jáne qajetti jabdyqtardyń bolmaǵany anyqtaldy.
ShQ Ekologııa departamenti mamandandyrylǵan tabıǵat qorǵaý prokýratýrasymen birlesip, asfalt-beton jáne usaqtaý-suryptaý qondyrǵylaryna jospardan tys tekserý júrgizdi. Tekserý Katonqaraǵaı, Samar aýdandaryndaǵy jáne Óskemen qalasyndaǵy kásiporyndardy qamtydy.
Shań shyǵaryndylarynyń normatıvten eń joǵary deńgeıde asyp ketýi «Katon-Qaraǵaıskıı PDÝ» JShS-niń asfalt-beton zaýytynda tirkeldi. Munda shań shyǵaryndylary belgilengen normatıvten 41 ese joǵary bolǵan.
Ekologtardyń málimetinshe, tekserý nátıjeleri shań ustaý jabdyǵynyń durys jumys istemeıtinin jáne shyǵaryndylardy tazartý tıimdiliginiń jetkiliksiz ekenin kórsetti.
- «№14 jol qurylysy basqarmasy» JShS-niń asfalt-beton zaýytynda da tazartý júıesiniń jumysynan zańbuzýshylyqtar anyqtaldy. Munda shań shyǵaryndylarynyń kontsentratsııasy belgilengen normatıvten 1,7 ese asyp ketken. Kásiporynda ornatylǵan shań ustaý jabdyǵy qajetti deńgeıde tazartýdy qamtamasyz etpegen, - delingen aqparatta.
Al «VektorSolano» JShS-niń usaqtaý-suryptaý qondyrǵysynda atmosferaǵa taralatyn lastaýshy zattardyń shyǵaryndylaryn azaıtýǵa arnalǵan jabdyqtyń múldem bolmaǵany anyqtaldy.
Taǵy bir kásiporyn – «SK Zaısan» JShS – asfalt-beton jáne usaqtaý-suryptaý qondyrǵylaryn tıisti ekologııalyq ruqsatsyz paıdalanǵan. Olardyń jumysyna úsh aı merzimge tyıym salyndy.
Tekserý qorytyndysy boıynsha kásiporyndar ákimshilik jaýapkershilikke tartyldy. Salynǵan aıyppuldardyń jalpy somasy shamamen 36 mln teńge boldy.
Sonymen qatar ekologtar anyqtalǵan zańbuzýshylyqtardy belgilengen merzimde joıý týraly nusqama berdi.
Eske salsaq, osyǵan deıin Almatyda tekserilgen ár tórtinshi kólik ekologııalyq normaǵa sáıkes kelmeıtindigi habarlanǵan.
