ShQO-daǵy Altaı qalasynda birneshe kúnnen beri qoqys polıgony órtenip jatyr

ÓSKEMEN.KAZINFORM – Shyǵys Qazaqstan oblysynyń Altaı qalasynda turmystyq qatty qaldyqtar polıgonyndaǵy órttiń beti qaıtpaı jatqanyna úsh kún boldy.

Kommýnaldyq qyzmetter táýlik boıy órtpen kúresip jatyr. Qala ákimi Sergeı Ohremenkonyń aıtýynsha, ot oshaǵy 10 metrden astam tereńdikte ornalasqandyqtan, tikeleı sý shashý tıimsiz bolyp otyr.

- Biz ottegi barýyn toqtatý úshin kúl-qoqys qaldyqtaryn tógý ádisin qoldanyp jatyrmyz. Jumystar úzdiksiz júrgizilip keledi. 6 tehnıka men 10-nan astam adam jumyldyrylǵan. Jaǵdaı baqylaýda. Órtpen óz kúshimizben kúresip jatyrmyz, TJD kúshteri tartylǵan joq, - dedi ol.

Alaıda qala turǵyndary aýadaǵy tútin men kúıik ıisiniń tipti úılerdiń ishine deıin sezilip jatqanyn aıtyp, dabyl qaqty.

- Tereze ashý múmkin emes, ásirese keshke. Bul balalardyń densaýlyǵyna áser ete me dep alańdaımyz, - deıdi jurt.

Eske salsaq, osyǵan deıin Almatyda eki avtokólik órtenip ketkenin jazǵan edik.