ShQO-nyń Altaı aýdanynda qalǵan jalǵyz ardager qaıtys boldy

ÓSKEMEN. KAZINFORM — Ekinshi dúnıejúzilik soǵystyń Shyǵys Qazaqstan oblysy Altaı aýdanyndaǵy sońǵy ardageri ómirden ozdy.

Aýdan ákimdiginiń málimetine súıensek, Vasılıı Rýdometov 99 jasqa qaraǵan shaǵynda qaıtys boldy. Jerleý rásimi orkestrdiń súıemeldeýimen ótip, batyrǵa qurmet kórsetildi. 

Vasılıı Grıgorevıch 1944 jyly 17 jasynda ásker qataryna shaqyrylǵan. Aldymen Bashqurtstandaǵy oqý polkinde saper mamandyǵyn meńgerip, keıin Manchjýrııaǵa attanǵan. Hıngan jotasyn asyp ótken jaýynger japon áskerimen shaıqasqa túsken. 

— Soǵysta eren erlik kórsetken maıdanger «Erligi úshin», «Japonııany jeńgeni úshin» jáne basqa da mereıtoılyq medaldarmen, Keńes Áskeri qataryndaǵy minsiz qyzmeti úshin «Madaqtama paraǵymen» marapattalǵan. Soǵystan keıin ol taǵy jeti jyl boıy ásker qatarynda qyzmet etken soń elge oraldy. Osynda jumys istep, óńirdiń damýyna ózindik úlesin qosty, — delingen aqparatta.

Eske salsaq, osyǵan deıin Shyǵys Qazaqstan oblysy Zaısan aýdanynda 102 jastaǵy Ekinshi dúnıejúzilik soǵys ardageri qaıtys bolǵany habarlanǵan.