ShQO-daǵy 80 mekteptiń tek 8-i ǵana memlekettik attestattaýdy birinshi retten óte aldy
ÓSKEMEN. KAZINFORM — Shyǵys Qazaqstan oblysynda byltyr memlekettik attestattaýdan ótken mektepterdiń basym bóligi bul rásimnen alǵashqy talpynysta óte almady. 80 bilim berý uıymynyń tek 8-i ǵana belgilengen talaptarǵa saı dep tanylǵan.
Oblystyq bilim basqarmasynyń málimetinshe, qalǵan 72 mektep memlekettik attestattaýdan qaıta ótýge májbúr bolǵan.
— Buǵan oqý josparlarynyń memlekettik jalpyǵa mindetti bilim berý standarttaryna sáıkes kelmeýi, pedagog kadrlardyń tapshylyǵy, bilim berý protsesin uıymdastyrýdaǵy kemshilikter jáne jekelegen muǵalimderdiń biliktilik deńgeıiniń jetkiliksizdigi negizgi sebep boldy, — delingen habarlamada.
Osyǵan uqsas jaǵdaı mektepke deıingi bilim berý uıymdarynda da tirkeldi. Memlekettik attestattaýdan ótken 33 balabaqshanyń tek ekeýi ǵana alǵashqy retten talaptarǵa tolyq sáıkes keldi. Qalǵan balabaqshalarda anyqtalǵan kemshilikterdi joıý úshin ýaqyt berildi.
Júrgizilgen túzetý jumystarynyń nátıjesinde 66 mektep pen 20 balabaqsha memlekettik attestattaýdan qaıta ótip, talaptarǵa saı ekendigin rastady. Al úsh jekemenshik mektepke deıingi uıym 2026 jyldyń ekinshi jartyjyldyǵyna deıin profılaktıkalyq baqylaýda bolady.
Anyqtalǵan kemshilikterdi joıý maqsatynda bilim berý uıymdary úshin jeke is-sharalar josparlary ázirlenip, mektep dırektorlary men pedagogter memlekettik bilim berý standarttarynyń talaptary boıynsha qosymsha oqytýdan ótti.
Eske salsaq, osyǵan deıin Qazaqstanda mektep medıtsınasynyń jańa standarty engiziletindigi habarlanǵan.
