ShQO-daǵy 74 ýchaskede sýǵa túsýge tyıym salyndy
ÓSKEMEN. KAZINFORM – Shyǵys Qazaqstan oblysynda aldaǵy shomylý maýsymynda 74 ýchaskede sýǵa túsýge tyıym salyndy.
ShQO TJD bastyǵynyń orynbasary Qýatbek Kenjebekulynyń aıtýynsha, oblys ákimdiginiń qaýlysyna sáıkes óńir boıynsha jappaı demalýǵa arnalǵan 22 ýchaske bekitilgen. Onyń ishinde 1 mýnıtsıpaldy (Ulan aýdany), 5 kommýnaldyq (Óskemen qalasy - 2, Rıdder qalasy – 1, Altaı aýdany – 2) jáne 4 jeke jaǵajaı (Ulan aýdany) bar.
«Oblystyq máslıhat sessııasynyń sheshimimen shomylýǵa tyıym salynǵan 74 ýchaske jáne shaǵyn kólemdi kemelerdiń júzýine tyıym salynǵan 29 ýchaske bekitildi. Ótken jyldyń shomylý maýsymyn taldaý kezinde aımaqtaǵy adamdardyń sýǵa batýynyń negizgi sebebi óz kúshin asyra baǵalaý ekendigi anyqtaldy», - deıdi Qýatbek Kenjebekuly.
Byltyr barlyǵy 6 adam sýǵa ketken. Barlyq jaǵdaı shomylýǵa jabdyqtalmaǵan jerlerde boldy. Buqtyrma sý qoımasynyń aýmaǵynda 3 adam, Zaısan kólinde 2 adam, Glýbochanka ózeninde 1 adam sýǵa batqan.
Osy jyly shomylý maýsymy bastalǵanǵa deıin jaǵajaılardyń túbin tekserý, eskertý belgileri, úgit-nasıhat stendterin ornatý jumystary júrgiziledi.
