ShQO-daǵy 6 aýdanda qurǵaqshylyq qaýpi bar
ÓSKEMEN. KAZINFORM – Shyǵys Qazaqstan oblysyndaǵy alty aýdanda qurǵaqshylyq bolý qaýpi týyndap otyr.
Óńirde jazdyń ortasy aptap ystyqpen ǵana emes, ylǵal tapshylyǵymen de qatar kelýi múmkin. Sınoptıkterdiń boljamyna sáıkes, shilde aıynda Shyǵys Qazaqstannyń birqatar aýdanynda qurǵaqshylyq qalyptasýy yqtımal.
Qaýip tek dástúrli túrde qýańshylyq jıi baıqalatyn ońtústik aýmaqtarmen shektelmeıdi. Táýekel aımaǵyna Zaısan, Kúrshim, Marqakól, Tarbaǵataı jáne Úlken Naryn aýdandary kirip otyr. Sondaı-aq Óskemen men Shemonaıha mańynda da jaýyn-shashyn mólsheriniń az bolýy boljanyp otyr.
Aýyl sharýashylyǵy úshin shilde aıy maýsymnyń eń mańyzdy kezeńderiniń biri sanalady. Dál osy ýaqytta eginniń negizgi ósý kezeńi júrip, ónim qalyptasady. Sondyqtan ylǵaldyń jetispeýi egistik alqaptarynyń, jaıylymdar men shabyndyqtardyń jaǵdaıyna eleýli áser etýi múmkin.
Degenmen mamandar bul boljamdy naqty qalyptasqan jaǵdaı retinde qabyldamaýǵa shaqyrady.
- Bul aldyn ala jasalǵan boljam. Ol jańa meteorologııalyq derekterdiń túsýine qaraı naqtylanyp otyrady, - dep málimdedi «Qazgıdromet» RMK mamandary.
Eske salsaq, osyǵan deıin ShQO ormandarynda órt qaýpiniń eń joǵary deńgeıi jarııalanǵany habarlanǵan.
