ShQO-daǵy 2 aýdan ákimi saılaýynyń nátıjesi shyqty

Shyǵys Qazaqstan oblysyndaǵy Altaı jáne Glýbokoe aýdandary ákimi saılaýynyń nátıjesi shyqty, dep habarlaıdy Kazinform.

Keshe Altaı jáne Glýbokoe aýdandarynda ákim saılaýy ótti. Ákim bolýǵa barlyǵy 5 adam kandıdat bolǵan. ShQO ákimdiginiń málimetinshe, daýys berýge aýdan turǵyndary belsene qatysty. Saılaý zańnamasyn buzý faktileri tirkelmedi.

Saılaý qorytyndysy boıynsha Altaı aýdanynyń ákimi qyzmetin Renat Qurmambaev atqarady.
Renat Tileýhanuly 1980 jyly 25 qańtarda Katonqaraǵaı aýdanynda dúnıege kelgen. «Injener-pedagog» jáne «zańger» mamandyqtary boıynsha eki joǵary bilimi bar.

Eńbek jolyn 1998 jyly Katonqaraǵaı aýdany Jańaýyl orta mektebinde muǵalim bolyp bastaǵan. Memlekettik qyzmetke alǵash ret 2003 jyly Katonqaraǵaı aýdanynyń jastarmen jumys jónindegi mádenıet bóliminiń bas mamany bolyp ornalasty.

2019-2021 jyldary Katonqaraǵaı aýdanynyń ákimi bolyp qyzmet etti. Osyǵan deıin Altaı aýdany ákiminiń orynbasary, ákim mindetin ýaqytsha atqarýshy boldy.

Al Glýbokoe aýdanynyń ákimi bolyp Eldar Týmashınov saılandy.

Eldar Luqbekuly 1987 jyly dúnıege kelgen. Abaı atyndaǵy Qazaq ulttyq pedagogıkalyq ýnıversıtetin, Qazaqstan Respýblıkasy Prezıdentiniń janyndaǵy Memlekettik basqarý akademııasyn bitirgen.

Eńbek jolyn 2012 jyly «Kazenergy» Qazaqstan munaı-gaz jáne energetıka kesheni uıymdarynyń qaýymdastyǵy» zańdy tulǵalar birlestiginde halyqaralyq yntymaqtastyq departamentiniń sarapshysy bolyp bastady.

Ár jyldary «Amanat» partııasynyń saıası menedjment mektebiniń Almaty fılıalynda basshylyq qyzmetterdi atqarǵan. «Ertis» ÁKK» AQ basqarma tóraǵasy bolyp eńbek etti.

2022 jyldyń qańtar aıynan Glýbokoe aýdanynyń ákimi boldy.