ShQO-daǵy 191 aýylda áli ınternet joq
Shyǵys Qazaqstan oblysyndaǵy 191 aýylda áli ınternet qosylmaǵan, dep habarlaıdy Kazinform.
Osy jyldyń basynan beri Shyǵys Qazaqstandaǵy 20 eldi mekenge keńjolaqty mobıldi ınternet qosyldy. Sonyń ishinde eń shalǵaıdaǵy Tarbaǵataı aýdany Asýsaı aýyly, Katonqaraǵaı aýdany Aqsý aýyly bar.
«Óńir boıynsha 363 eldi mekenniń 172-si ınternetpen qamtylǵan, al 191-i áli qosylmaǵan. Óskemendegi №19, 20, 21-shi shaǵyn aýdandar ınternetpen qamtamasyz etildi, aldaǵy ýaqytta 25-shi shaǵyn aýdandy qamtý josparlanyp otyr. Atalǵan shaǵyn aýdandaǵy telekommýnıkatsııa jelilerin qosý boıynsha operatorlarmen kelissózder júrgizilip jatyr», - dedi ShQO Tsıfrlandyrý men muraǵattar basqarmasynyń basshysy Serikhan Nurtazın.
Sonymen qatar bıyl Shemonaıha aýdanynda Aitas holdınginiń «Aitas Foundation» korporatıvtik qorynyń bastamasymen «Aýyldaǵy ınternet» qanatqaqty jobasy iske qosyldy.
«Turǵyndardy ınternetke qosý maýsym aıynyń sońynda bastaldy. Qazirgi ýaqytqa deıin Shemonaıha qalasynda 247 abonent ınternetke qosylǵan. Budan bólek, Shemonaıha aýdanyndaǵy Ýst-Talovka, Vydrıha jáne Verh-Ýba aýyldarynda, Katonqaraǵaı aýdany Katonqaraǵaı, Úlken Naryn aýyldarynda da osy baǵyttaǵy jumystary júrgizilip jatyr», - deıdi basqarma basshysy.
