ShQO-daǵy 17 jaǵajaıda qaýipsizdik talaptary saqtalmaǵan

ÓSKEMEN. KAZINFORM – Shyǵys Qazaqstanda jyl basynan beri 9 adam sýǵa batyp ketti.

1 maýsymnan bastap óńir boıynsha tórt adam sýǵa batty. Olardyń ekeýi — jasóspirimder. Al jyl basynan beri sý aıdyndarynda toǵyz qaıǵyly jaǵdaı bolǵan.

— Qazirgi tańda oblys boıynsha 25 jaǵajaı bar. Alaıda olardyń tek segizi ǵana demalýshylardy qabyldaýǵa tolyq daıyn. Atap aıtqanda, Óskemen qalasynda — 2 kommýnaldyq jaǵajaı, Rıdderde — 1, Ulan aýdanynda — bir mýnıtsıpaldy jáne 4 jeke jaǵajaı. Qalǵan 17 jaǵalaý qaýipsizdik talaptaryna sáıkes kelmeıdi, — dep habarlady ShQO TJD.

Altaı, Zaısan, Samar jáne Ulan aýdandaryndaǵy 13 jaǵajaıdyń ıelerinen quzyrly organdarǵa tekserý júrgizýge qatysty eshqandaı ótinish jiberilmegen.

Eske salsaq, osyǵan deıin Óskemende qaı jerlerde sýǵa túsýge bolatyndyǵy jaıly jazǵanbyz.