ShQO-da zııandy eńbek jaǵdaılary úshin tólemaqy 2 jyldan keıin tólene bastady
ÓSKEMEN. KAZINFORM — Shyǵys Qazaqstan oblysynda zııandy eńbek jaǵdaılarynda jumys isteıtin qyzmetkerlerge arnalǵan tólem tek eki jylǵa jýyq ýaqyttan keıin ǵana turaqty berile bastady.
Bul qoldaý sharasy 2024 jyldan bastap engizilgen jáne zııandy eńbek jaǵdaıynda keminde 84 aı jumys istegen azamattarǵa arnalǵan. Mindetti talap — osy eńbek ótilin zeınetaqy aýdarymdary arqyly rastaý.
Alaıda is júzinde baǵdarlamany iske qosý ońaıǵa soqpady. Barlyq jumysshy birden eńbek ótilin dáleldeı almady, al jumys berýshiler qajetti málimetterdi árdaıym durys rásimdeı bermegen. Sonyń saldarynan tólemder birkelki taǵaıyndalmady.
— Bastapqy kezeńde shynymen de qıyndyqtar boldy. Biz jumys berýshilerge de, qyzmetkerlerge de túsindirý jumystaryn júrgizdik, eńbek ótilin rastaý tártibin naqtyladyq. Qazir mehanızm tolyq jolǵa qoıyldy, 2026 jyldan bastap járdemaqy turaqty túrde taǵaıyndalyp keledi, — dedi áleýmettik qorǵaý salasyn retteý jáne baqylaý komıteti ShQO boıynsha departamentiniń ókili Rıza Ahmetova.
Vedomstvonyń málimetinshe, qazirgi ýaqytta júıe irkilissiz jumys isteıdi. Negizgi nazar aldaǵy ýaqytta mundaı jaǵdaılardyń qaıtalanbaýyna jáne járdemaqyny alýǵa quqyǵy bar barlyq azamattyń oǵan qol jetkizýin qamtamasyz etýge aýdarylyp otyr.
Eske salsaq, osyǵan deıin ShQO-da bıyl zańsyz jumys istegen 180-nen astam sheteldik jaýapqa tartylǵany habarlanǵan.
