ShQO-da jylytý maýsymy bastalǵaly beri 648 órt bolyp, 36 adam kóz jumǵan
ÓSKEMEN. QazAqparat – Shyǵys Qazaqstan oblysynda jylytý maýsymy bastalǵaly turǵyn úı sektorynda 648 ret órt shyqqan, dep habarlaıdy QazAqparat tilshisi.
ShQO TJD Memlekettik órt baqylaý basqarmasynyń bastyǵy Rınat Qondybaevtyń aıtýynsha, órtten 36 adam qaza bolǵan. Al ıis tıip kóz jumǵandar sany 22 paıyzǵa artyp, 11 adamdy qurady.
«Jalpy ıis tııýden 75 adam zardap shekti, onyń 30-y bala. 70 paıyz jaǵdaıda ýlanýdyń negizgi sebepteri - órt qaýipsizdigi talaptaryn saqtamaý, pesh murjalaryn ýaqytyly tazalamaý», - dedi ol.
Sondaı-aq sońǵy ýaqytta jer úıler men saıajaılarda órt oqıǵalar jıilep ketken.
«Óńir jurtshylyǵy saıajaılardy qysta turý úshin qamdaǵan kezde órt qaýipsizdigi talaptaryn eskermeı jatady. Mine, osynyń saldarynan qyzyl jalynnyń shyǵý qaýpi artady. Jylytý maýsymy bastalǵaly beri turǵyn úı sektorynda tirkelgen órtterdiń jalpy sanynyń 5 paıyzy saıajaılarda bolǵan», - dedi Rınat Qondybaev.
Órt qaýipsizdigin qamtamasyz etý úshin qutqarýshylar turǵyn úılerdi aralap, túsindirý jumystaryn júrgizýde. Búgingi tańda 402 myń úı, 558 myń adam qamtylǵan. Nátıjesinde, órt qaýipsizdigi erejelerin buzǵan 167 myń turǵyn úı anyqtaldy.
