ShQO-da jylyna 7,5 myń tonna et óndiretin kombınat salynbaq
ShQO ákiminiń birinshi orynbasary Almashan Smatlaevtyń tóraǵalyǵymen ótken keńeıtilgen apparat otyrysynda aımaqtyń aýyl sharýashylyǵy ónimderin óndirý, qaıta óńdeý jáne jańa kásiporyndardy qurý maqsatynda atqarylyp jatqan jumystar sóz etildi. Qazirgi ýaqytta oblys aýmaǵynda qaıta óńdeý salasynda jalpy somasy 193 mlrd teńgeni quraıtyn jańa óndiris oryndaryn salý jáne jumys istep turǵandardy keńeıtý baǵytynda 10 ınvestıtsııalyq joba júzege asyrylýda.
«Osy jyldyń sońyna deıin shıkizat boıynsha júktemeni 30-40% deıin jetkizý josparlanýda. Maıly daqyldardy óńdeıtin kásiporyn 2022 jyly tolyq qýatpen jumys isteıdi. 2021 jyly kúnbaǵys, raps, zyǵyr jáne soıa egis alańdary 30 myń gektarǵa ulǵaıyp, 476 myńdy quraıdy. Bul rette maıly daqyldardyń jalpy túsimi ótken jyldyń deńgeıine qaraǵanda 53 myńǵa artyp, 668 myń tonnaǵa jetkizilmek», - dedi ShQO Aýyl sharýashylyǵy basqarmasynyń basshysy Vladımır Gaılamazıan.
Onyń aıtýynsha, oblysta jylyna 7,5 myń tonna et óndiretin kombınat salý jobasy júzege asyrylyp jatyr. Et kombınatynyń qýattylyǵy kún saıyn segiz myń banka konservi, úsh tonna shujyq jáne bir tonna jartylaı fabrıkattar shyǵarýǵa múmkindik beredi. Sondaı-aq Óskemen qus fabrıkasy bıyldan bastap broıler etin óndirý qýatyn jylyna 29,5-ten 55 myń tonnaǵa deıin keńeıtý baǵytynda jumystardy bastady. Al «Prıırtyshskaıa broıler qus fabrıkasy» JShS basshylyǵy osy jyldyń qańtar aıynan bastap qus sharýashylyǵy korpýstarynda jáne soıý tsehynda Nıderlandy men Belarýsııadan jańa jabdyqtardy ornatý boıynsha jóndeý jumystaryn júrgizýde.
ShQO ákiminiń birinshi orynbasary Almashan Smatlaev bıyl et pen sút ónimdiligin arttyrý qajettigine nazar aýdardy.
«Respýblıka boıynsha bizdiń oblys sút pen et óndirýde aldyńǵy lekte. Alaıda 2021 jylǵy aqpan men qańtar aılaryndaǵy kórsetkishter kóńil kónshitpeıdi. Aýyl sharýashylyǵy basqarmasy osy máseleni pysyqtaýy tıis», - dedi ol.
