ShQO-da jylyna 4 myń tonna taýarly balyq ósirý kózdelýde
Bıyl QR Úkimetinde balyq sharýashylyǵyn damytýǵa erekshe kóńil bólinýde. Shyǵys Qazaqstanda tabıǵı-klımattyq jáne geografııalyq jaǵdaılarǵa sáıkes balyq ónerkásibin keńeıtý boıynsha jańa joba ázirlendi. Jobany iske asyrý aıasynda 2030 jylǵa qaraı jyl saıyn kem degende 4 myń tonna taýarly balyq alý josparlanyp otyr
Búginde ShQO ákimi Danıal Ahmetovtyń tapsyrmasy boıynsha sý qoımalary men kásiporyndardyń áleýetin zertteý maqsatynda aımaq basshysynyń orynbasary Erjan Nurbaev bastaǵan jumys toby aýdandarǵa shyǵýda. Jumys toby buǵan deıin Kókpekti jáne Kúrshim aýdandarynda bolyp, «Rybprom» JShS, «Kýzmıch» JShS jáne tóre «Toǵam» JShS balyq óńdeý kásiporyndaryn aralady. Kompanııalarda balyq eksporttyq ónimderiniń keń assortımenti óndiriletin óz shıkizaty bar.
Óńirde shabaqtardy óndirý kólemi artyp keledi. Ol úshin Buqtyrma ýyldyryq shashý-ósirý sharýashylyǵy ótken jyly 4,5 mln dana balyq shabaqtaryn ósirdi. Sondaı-aq Zaısan kóliniń jaǵalaýyndaǵy balyq aýlaıtyn aýyldardyń turǵyndarymen kezdesý ótkizildi. Aqsýat aýylynda jergilikti balyqshylar balyq aýlaýdyń búgingi ahýaly týraly habardar etti, sondaı-aq balyq sharýashylyǵyn odan ári damytý boıynsha óz usynystarymen bólisti.
Tarbaǵataı aýdanynda sý qoımalary men kásiporyndardyń áleýetin zertteý jumystary jalǵasyn tapty. Sapar barysynda ShQO ákiminiń orynbasary balyq aýlaý jáne balyq óńdeýmen aınalysatyn «Baıtoǵas» ÁKK sharýashylyǵyna bardy. Munda balyqtyń 7 túri kezdesedi, jyldyq lımıt 810 tonnany quraıdy, al óńdelgen ónim Qazaqstan men Reseıge jetkiziledi. Kásiporynnyń atqarýshy dırektory Bolathan Asylhanovtyń aıtýynsha, balyq sharýashylyǵynyń bolashaǵy – akvaósirý, ıaǵnı jasandy balyq ósirý.
«Biz muny ýaqytynda túsindik jáne 2018 jyly alǵashqylardyń biri bolyp forel ósirýdi bastadyq. «Shyǵysýnıversal» JShS-men yntymaqtastyq ornatylǵan. Balyq sharýashylyǵy sýbektilerin damytýǵa sáıkes biz jylyna 50 tonna forel ósiremiz. Balyq bólshektep óńdeledi jáne Qazaqstan boıynsha, sondaı-aq Reseıdiń Dımıtrovgrad qalasynda satylady», - dedi Bolathan Asylhanov.
Jalpy, Shyǵys Qazaqstanda baǵaly balyq túrlerin jasandy ósirý baǵyty boıynsha 3 joba sátti júzege asyryldy. Ekeýi forel ósirýmen («Shyǵysýnıversal» JShS, «GrandFısh» JShS), bireýi bekire ósirýmen aınalysady («OstFish» JShS).
«QR Premer-Mınıstri Asqar Mamın Qazaqstanda akvamádenıetti damytýdy tapsyrdy. Shyǵys óńiriniń bul úshin áleýeti zor, bizde kóptegen ózender men kólder bar. Sondyqtan múmkindikter men problemalyq máselelerdi zertteý úshin osyndaı saparlardy uıymdastyramyz. Balyqshylarmen, qaıta óńdeýshilermen kezdesemiz. Bizde Qarabulaqta biregeı zaýyt bar. Bizdiń negizgi mindetimiz – ony iske qosý, shıkizat bolý úshin ýchaske berý, sonymen birge zaýytta kvotasy bar balyqshylarmen birlesken kooperatsııa qurýdy yntalandyrý», - dedi Erjan Nurbaev.
Onyń aıtýynsha, qazir oblystyń arnaıy jospary ázirlendi. Jospar aıasynda 2030 jylǵa qaraı kem degende 4 myń tonna taýarly balyq, onyń ishinde 3,6 myń tonna forel ósirý josparlanýda.
«Ótken jyly óńirde 260 tonna forel men 12 tonna bekire ósirildi. Osy jyldyń qorytyndysy boıynsha 300 tonnaǵa jýyq forel jáne 20 tonnadan astam bekire tuqymdas balyq bolady. Jospardy oryndaý úshin biz balyq ósiretin torlardy kóbeıtip, bos jerlerdi halyqqa berýimiz kerek. Bizde akvamádenıetti damytý úshin barlyq jaǵdaı bar. Zaısan kóliniń jaǵalaýynda úlken suranysqa ıe tabıǵı balyqtar kezdesedi. Turǵyndardyń da balyq satýda tájirıbesi mol. Bizdiń kókserke Danııa, Germanııa, Latvııa elderinde suranysqa ıe. Bul rette óndiriste barlyq standarttar saqtalady. Men balyq ónerkásibin damytý jónindegi jospardy tabysty iske asyratynymyzǵa senimdimin. Tek kásipkerlerge qajetti qoldaý kórsetý kerek», - dep túıindedi Erjan Nurbaev.
