ShQO-da jylyna 10 tonna altyn óndiretin kásiporyn iske qosyldy
Qazaqstannyń ónerkásip kartasynda jańa altyn óndirisi paıda boldy. 2014 jyly Reseıdiń "Polımetall" kompanııasy atalmysh ken ornyn ıgerýge ınvestor retinde tartylǵan bolatyn. Tórt jyldyń ishinde Baqyrshyqtyń altynyn ıgerý jobasy jasalyp, kásiporynnyń tsehtary men jumysshylar qalashyǵy boı kóterdi. Kásiporynnyń ashylýyna Shyǵys Qazaqstan obylysy ákiminiń orynbasary Serik Aqtanov, "Polımetall" AQ bas dırektory Vıtalıı Nesıs qatysyp, Áýezov kentiniń turǵyndaryn eleýli oqıǵamen quttyqtady.
"Shyǵys Qazaqstan altyn, mys jáne myrysh qory boıynsha elimizde birinshi oryn alady. Jyldyń alǵashqy 5 aıynda metall óndirisiniń kólemi ótken jylmen salystyrǵanda 85 paıyzǵa artty. Bul ózgeriske "Baqyrshyq taý-ken óndirý kásiporny ólsheýsiz úles qosty" - dedi Serik Aqtanov.
Investordyń aıtýynsha, Baqyrshyq keni qurylymy jóninen asa kúrdeli túzilim sanalady. Qazylǵan kenniń 10 tonnasynan 7,7 gramm altyn óńdeledi degen esep bar. Mundaǵy taza altyn qory 280 tonna dep baǵalanǵan.
"Sońǵy 50 jylda Baqyrshyq kenin ıgerýge kóptegen kompanııalar kúsh salǵan bolatyn. Sonyń eshbiri onyń kiltin taba almaǵan. Bul kásiporynnyń ashylýy Áýezov kenti úshin ǵana emes, búkil Jarma aýdany úshin tarıhı oqıǵa. Qazir Áýezov kentinde jumyssyzdyq degen atymen joq. Páter jaldaý quny Astana qalasymen birdeı. Kompanııa 4 jylda bıýdjetke 4,5 mlrd teńge salyq túsirdi" - deıdi Jarma aýdanynyń ákimi Nurlan Sydyqov.
Kásiporyn tolyq qýatyna 2019 jyly shyǵady dep josparlanǵan. Bul kezde jylyna 10 tonna altyn óndirilýi tıis. Alǵashqy 10 jylda ken ashyq ádispen óndirilse, ekinshi kezeńde 20 jyldan astam ýaqyt boıy shahtalyq tásilmen ıgerilmek.
Qazir kásiporynda 990 adam jumys isteýde. Onyń 40 paıyzy Áýezov kenti men irgedegi aýyldardan jasaqtalǵan. Jyl aıaǵyna deıin jumysshylar sanyn 1031 adamǵa jetkizý josparlanýda.
