ShQO-da jyl sońyna deıin taǵy 45 myń adam ataýly áleýmettik kómek alady

ÓSKEMEN. QazAqparat - 2019 jyldyń aıaǵyna deıin taǵy 45 myńnan astam shyǵysqazaqstandyq ataýly áleýmettik kómekke ıe bolady, dep habarlaıdy QazAqparat tilshisi.

Bul málimet oblys ákimdiginiń kezekti májilisinde aıtyldy. Jalpy, atalmysh maqsatqa respýblıkalyq jáne oblystyq bıýdjetten 7 mlrd teńgeden astam qarajat bólingen.

«Alǵashqy 5 aıdyń ózinde 47 myń adam ataýly kómekke ıe boldy. Atalmysh tólem eki tásilmen berilip jatyr. Januıada eńbekke jaramdy adam bola tura, negizsiz sebeptermen jumys istemese, olarǵa ataýly áleýmettik kómek 6 aıǵa taǵaıyndalady. 42 myń adam kómektiń osyndaı túrin alyp otyr. Onyń ishinde 14,5 myń adam jumysqa turǵyzyldy. 6841 adamnyń jumysy bolsa da, tabysy óte tómen bolýyna baılanysty 12 aıǵa ataýly áleýmettik kómek taǵaıyndaldy. Onyń 1300-i basqa jumysqa aýysty», - deıdi oblys ákiminiń orynbasary Ásem Núsipova.

Onyń aıtýynsha, oblystyq jumyspen qamtý ortalyǵynda 12 ret analarmen kezdesý uıymdastyrylǵan.

«Bıyl kópbalaly jáne az qamtylǵan otbasydan shyqqan 1087 bala 9-11 synyptardy aıaqtap otyr. Óńir boıynsha tehnıkalyq-kásiptik kolledjerde 6200 tegin oryn qarastyrylǵan. Sondaı-aq, nátıjeli jumyspen qamtý jáne buqaralyq kásipkerlik aıasynda 1730 oryn bólingen. Qazir osy múmkindikti paıdalanýǵa nıetti otbasylardyń tizimi jasalýda», - deıdi ákimniń orynbasary.

Bul maqsatqa bıýdjetten 4,5 mlrd teńge bólinip otyr.