ShQO-da jyl sońyna deıin 80-nen astam úı paıdalanýǵa beriledi

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov qala jáne aýdan basshylarymen turǵyn úı qurylysy máseleleri boıynsha selektorlyq keńes ótkizdi, dep habarlaıdy QazAqparat tilshisi.

Búginde óńirde bir qabatty turǵyn úı salýǵa baǵyttalǵan baǵdarlama sátti júzege asýda. Osy jyldyń basynan beri 36,6 myń sharshy metrdi quraıtyn 382 páterlik 206 úı halyqtyń áleýmettik osal toptaryna berilgen.

Jyl sońyna deıin taǵy 145 páterli 83 úıdi paıdalanýǵa berý josparlanyp otyr. Barlyq úılerde tolyq árleý jumystary júrgizilip, plastıkalyq terezeler qoıylyp, sý jáne elektr júıeleri tartylǵan.

«Jańa jylǵa deıin 145 páterge kezekte turǵan kópbalaly jáne az qamtylǵan otbasylar qonystanady. Sondaı-aq salynyp jatqan úılerdiń sáýlettik kelbetin jaqsartý úshin jańadan eskızdik jobalar ázirleýdi tapsyramyn. Ákimder men Densaýlyq saqtaý basqarmasy, ásirese, shekaralyq aımaqtaǵy burynǵy aýdan ortalyqtarynda ekinshi deńgeıli perzenthana ashý isin ary qaraı jalǵastyrýlary tıis. Aldaǵy jyly bul baǵytta qarqyndy jumys atqarylmaq. Buǵan qajetti qarajat tolyqtaı bólinedi», - dedi ShQO ákimi Danıal Ahmetov.

Aıta ketý kerek, 2021 jyly oblysta taǵy 705 bir qabatty turǵyn úı salý josparlanǵan.