ShQO-da jyl sońyna deıin 277 ІT-synyp ashylady
ÓSKEMEN. QazAqparat - Shyǵys Qazaqstan mektepterinde jyl aıaǵyna deıin 277 ІT-synyp ashylady. Bul týraly oblys ákimi Danıal Ahmetov daryndy balalarmen kezdesýde aıtty, dep habarlaıdy QazAqparat tilshisi.
Dúnıejúzilik balalardy qorǵaý kúninde Danıal Ahmetov aımaqtyń daryndy balalarymen kezdesti. Respýblıkalyq «Nur Otan - balalarǵa!» aktsııasy aıasynda daryndy órender aımaq basshysymen beıresmı jaǵdaıda suhbat qurdy. Ákim olarmen elimizdiń damý baǵyty jaıynda áńgime órbitip, Tórtinshi ónerkásiptik jańǵyrý jaǵdaıyna toqtaldy.
Búgin «Nur Otan» partııasynyń saıası bıýro jıynynda Qazaqstan boıynsha 1000 tegin IT-synyp ashý mindeti qoıylǵany belgili. Sol mindettiń Shyǵysta qalaı iske asatyny da aıtyldy.
«Shyǵys Qazaqstan bul mindetti jyl kóleminde sheshedi. Mejedegi 1000 synyptyń 277-si bizdiń óńirde ashylýy tıis. Qoldanystaǵy robot tehnıkasy kabınetterin kompıýterlik synyptarmen kiriktiremiz. Jaqyn arada Óskemende baǵdarlamalaý isiniń sheberleri salalyq forýmda bas qospaq. Oǵan eresek bilgirler men qatar, talantty balalardy da shaqyramyz. Búgigi kezdesýge qatysqan ul-qyzdar sol forýmǵa qatysatyn myqty baǵdarlamashylardyń izbasaryna aınalýyn qajet», - dedi aımaq basshysy.
Kezdesýge shaqyrylǵan 26 balaǵa Danıal Ahmetov salaýatty ómir saltyn saqtaý úshin velosıped sertıfıkattaryn tabys etti.
