ShQO-da jyl sońyna deıin 14 úı paıdalanýǵa berilmek
ÓSKEMEN. QazAqparat – Shyǵys Qazaqstan oblysy Altaı aýdanynda osy jyldyń aıaǵyna deıin 14 úı paıdalanýǵa beriledi, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken baspasóz konferentsııasy barysynda Altaı aýdanynyń ákimi Qalıhan Baıǵonysov turǵyn úı qurylysy, sondaı-aq halyqtyń áleýmettik osal toptaryn turǵyn úımen qamtamasyz etý jumystary jaıly baıandady.
«Alpys otbasy jańa turǵyn úımen qamtamasyz etildi, onyń ishinde kópbalaly januıalar úshin 27 páter satyp alyndy. Qazan aıyndaǵy jaǵdaı boıynsha kommýnaldyq turǵyn úı qorynan páter alý kezeginde 1164 adam tur, onyń ishinde halyqtyń áleýmettik osal toptarynan 945 adam bar», - dedi ol.
Qazirgi ýaqytta jeke qurylys kompanııalarynyń esebinen Altaı qalasynda jańa 14 jeke turǵyn úıdiń qurylysy júrgizilýde. Aýdan ákiminiń aıtýynsha, atalǵan úıler jyl sońyna deıin paıdalanýǵa berilmek.
«Sondaı-aq, aýdanda taǵy bir 60 páterli úıdiń qurylysy josparlanýda. Budan bólek, Altaı qalasynda eki úıdiń (60 jáne 100 páter) jáne Serebrıansk qalasynda 60 páterli úıdiń qurylysyna jobalyq-smetalyq qujattama ázirlengen», - dedi Qalıhan Baıǵonysov.
