ShQO-da jyl saıyn keminde 700 myń sharshy metr baspana salynbaq

ÓSKEMEN. QazAqparat – Shyǵys Qazaqstan oblysynda jyl saıyn keminde 700 myń sharshy metr turǵyn úı salyný josparlanyp otyr, dep habarlaıdy QazAqparat tilshisi.

Aımaq basshysy Danıal Ahmetov 2022-2025 jyldarǵa josparlanǵan qurylys jobalaryn iske asyrý boıynsha jınalys ótkizdi.

Búgingi tańda 171 nysannyń jobalyq-smetalyq qujattamasy ázirlený satysynda. Bul – 650 myń sharshy metrden astam turǵyn úı.

«Bıyl óńirde qurylys qarqyny alǵash ret mıllıon sharshy metrden asty. Sondaı-aq qurylys jumystarynyń nátıjeligi boıynsha Semeı qalasy Óskemendi basyp ozdy. Endi bul kórsetkishten tanbaı, aldaǵy jyldarǵa utymdy jospar qurý kerek», - dedi Danıal Ahmetov.

Onyń aıtýynsha, «Birqabatty Shyǵys» baǵdarlamasy aıasynda kommertsııalyq jáne nesıelik úıler salynýda. Halyq arasynda ol úılerge suranys joǵary.

«Kelesi jyly birinshi bolyp qarjylandyrýdy bıyl jaqsy nátıje kórsetken aýdandar alatynyn atap ótkim keledi. Sondaı-aq elimizdiń basqa qalalary men oblystaryndaǵy qurylys kompanııalaryn qaıta tartýǵa daıynbyz. Áleýmettik jáne mádenı obektiler salýdy josparlaý, onyń ishinde barlyq qajetti ınjenerlik kommýnıkatsııalardy júrgizýge 2023 jyly qosymsha qansha qarjy qajet ekenin esepteý kerek. Qarqyndy báseńdetpeı, 2022-2025 jyldar aralyǵynda jyl saıyn kemine 700 myń sharshy metr turǵyn úı salý kózdelip otyr», - dedi ShQO ákimi.