ShQO-da jyl basynan beri jol apatynan 52 bala jaraqat alǵan
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri jol-kólik oqıǵalarynan 52 bala jaraqat alǵan, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńir boıynsha «Abaılańyz, balalar!» jedel aldyn alý sharasy ótip jatyr. Sonyń aıasynda polıtseıler jergilikti atqarýshy organ ókilderimen, bilim berý, densaýlyq saqtaý salalarynyń jáne úkimettik emes uıymdardyń qyzmetkerlerimen birlesip mektep jáne oǵan deıingi jalpy bilim berý mekemelerinde balalardyń jol-kólik oqıǵalarynan jaraqat alýynyń aldyn alý boıynsha túsindirý jumystaryn qolǵa alǵan.
«Eki kúnniń ishinde tártip saqshylary 467 jol erejesin buzý faktisin anyqtady. Jaıaý júrginshiler jolaǵynan ótip bara jatqandarǵa jol bermegen 33 júrgizýshi jaýapqa tartylǵan. Sondaı-aq 30 adam búldirshinderdi arnaıy kreslosyz tasymaldaǵan», - delingen habarlamada.
Aıta keteıik, 2021 jyldyń basynan beri oblys aýmaǵynda kámelettik jasqa tolmaǵan balalardyń qatysýymen 46 jol apaty tirkeldi. Osynyń saldarynan 1 bala kóz jumyp, 52 bala ártúrli dárejedegi dene jaraqat alǵan.
