ShQO-da jyl basynan beri turmystyq zorlyqqa tap bolǵan 84 áıelge ýaqytsha baspana berilgen
ShQO Polıtsııa departamenti baspasóz qyzmetiniń málimetine súıensek, óńirde otbasyndaǵy zorlyq-zombylyqtyń aldyn-alý maqsatynda 13-15 qarasha aralyǵynda respýblıkalyq aktsııa ótkizilip jatyr.
«Jyl basynan beri ShQO áıelderdi zorlyq-zombylyqtan qorǵaý bólimshesiniń ınspektorlary ýaqytsha baspana berý úshin 84 áıeldi daǵdarys bólimshelerine jiberdi, al 1 854 áıel daǵdarys ortalyǵynyń psıhologtarynan keńes aldy. El aýmaǵynda karantın shekteýiniń engizilýine baılanysty úkimettik emes uıymdardyń ókilderimen birge turmystyq zorlyq-zombylyqqa ushyraǵan adamdarmen onlaın rejımde kezdesý ótkizilýde», - dep habarlady vedomstvo ókilderi.
Aktsııa otbasyndaǵy turmystyq zorlyq-zombylyqtyń aldyn alý, ana men balany qorǵaý, qoǵamdaǵy otbasynyń rólin nyǵaıtýǵa baǵyttalǵan. Óńirdiń polıtsııa qyzmetkerleri turǵyndarǵa 77-46-76 senim telefony arqyly turaqty túrde túsindirý jumysyn júrgizýde. Otbasylyq-turmystyq qatynastar salasyndaǵy máselelerdi túsindirý jáne aqysyz keńes berý maqsatynda jedel jeli (77-19-22, 8-771-44-511-44) iske qosyldy. Sonymen qatar otbasy tynyshtyǵyn jıi buzatyn adamdar men berekesiz otbasylarǵa turǵylyqty jeri boıynsha tekserý júrgiziledi.
