ShQO-da jyl basynan beri naızaǵaıdan ormanda 12 ret órt shyqqan
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri naızaǵaıdyń saldarynan ormanda 12 ret órt shyqqan, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, naızaǵaı soǵýy saldarynan óńirde jazataıym oqıǵalar men órtter az tirkelip jatqan joq. Sońǵy úsh jylda naızaǵaıdan 2 adam zardap shekken. Al bıyl bul 12 orman órtine sebepshi bolyp otyr.
«Naızaǵaıdyń elektr razrıadtary óte qaýipti. Shyǵys Qazaqstanda negizinen mamyr-qyrkúıek aılary aralyǵynda kún kúrkireıdi. Osy rette, qaýipsizdik maqsatynda turǵyndarǵa terezeleri myǵym jabylǵan bólmelerde naızaǵaıdyń basylǵanyn kútý kerektigin eskertemiz. Elektr jelileriniń janynda turmaǵan abzal. Oblysta naızaǵaıdyń saldarynan shopandar qaza bolyp jatady. Ádette, naızaǵaı kezinde olar atqa minip shaýyp ketken. Al buǵan qatań tyıym salynady. Eger siz naızaǵaı kezinde ashyq dalada bolsańyz, onda toqtap, attan túsip, aýa-raıynyń turaqtalǵanyn kútýińiz kerek», - dep habarlady vedomstvo ókilderi.
Departament mamandarynyń aıtýynsha, úıde otyrǵandar naızaǵaıdyń turmystyq tehnıka úshin qaýipti ekendigin qaperde ustaǵan jón. Sondyqtan elektr qurylǵylaryn óshirip qoıý qajet.
«Qazgıdromet» ShQOF aqparatyna sáıkes, 22 mamyrda Shyǵys Qazaqstan oblysynyń keı jerlerinde naızaǵaı oınap, soltústik-shyǵystan sekýndyna 15-20 metr jyldamdyqpen jel soǵady.
