ShQO-da jyl basynan beri brakonerler 6 myń keli balyq aýlaǵan
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri brakonerler 6 myń keli balyq aýlady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tabıǵat qorǵaý polıtsııasynyń qyzmetkerleri bıyl balyq resýrstaryn saqtaý maqsatynda 320 ret reıd ótkizgen. Sonyń nátıjesinde 239 ekologııalyq quqyq buzýshylyq anyqtaldy. Brakonerlerge qatysty 10 fakti boıynsha sotqa deıingi tergeý júrgizilip, 229 adam ákimshilik jaýapkershilikke tartyldy.
«Jyl basynan beri zańsyz aýlanǵan 6 myń keli balyq tárkilengen. Sonyń saldarynan memleketke 3 mln teńgeden astam materıaldyq shyǵyn keltirildi. Sońǵy 4 kún ishinde oblysta balyq resýrstaryn zańsyz aýlaýdyń 66 faktisi tirkelgen. 64 adamǵa jalpy somasy 1 mln teńge mólsherinde aıyppul salyndy», - delingen habarlamada.
Máselen, 18 sáýirde «Omby-Maıqapshaǵaı» tasjolynyń 914 shaqyrymynda patrýldik polıtsııa rotasynyń ınspektorlary polıtsııa aǵa leıtenanty Tileýjan Lepesov pen polıtsııa aǵa leıtenanty Dýman Sovethanov patrýldeý kezinde «Chevrolet» markaly avtokólikti toqtatqan. Tekserý kezinde tıisti ruqsat qujattary joq 6 qap shortan balyǵy tabyldy. Memleketke keltirilgen jalpy shyǵyn 198 000 teńgeni qurady. Semeı qalasynyń 54 jastaǵy turǵynyna qatysty QR ÁQBtK-niń 339-baby jáne 389-baby 3-bóligine sáıkes ákimshilik hattama toltyryldy.
