ShQO-da jyl basynan beri 70-ten astam kólik otqa oranǵan
ÓSKEMEN. QazAqparat – Shyǵys Qazaqstan oblysynda jyl basynan beri 70-ten astam kólik órtengen, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 17 mamyrda saǵat 12.26-da Rıdder qalasy Samokvıtova kóshesiniń boıyndaǵy 2 qabatty turǵyn úıdiń aýlasynda «Mercedes» markaly avtobýs órtengen.
Oqıǵa ornyna jedel jetken órt sóndirýshiler jalpy aýdany 25 sharshy metrdi quraǵan tilsiz jaýdy aýyzdyqtap, onyń ary qaraı taralýyna jol bermedi. Aldyn ala málimet boıynsha jalynnyń shyǵýyna – otqa abaısyz paıdalaný sebep bolǵan.
«Jyl basynan beri óńir boıynsha 70-ten astam kólik otqa oranǵan. Departament qutqarýshylary avtokólik ıelerine órt shyǵýynyń aldyn alýǵa bolatyndyǵy jaıly túsindirý jumystaryn únemi júrgizýde. Mashınanyń tehnıkalyq jaǵdaıyn muqııat qadaǵalap, tekserýden ýaqtyly ótkizý kerek», - dep habarlady vedomstvo ókilderi.
