ShQO-da jyl basynan beri 600-ge jýyq órt boldy
ÓSKEMEN. QazAqparat – Shyǵys Qazaqstan oblysynda jyl basynan beri 579 órt boldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, jyl basynan beri óńir boıynsha 579 órt boldy. Onyń 177-si jer úılerde tirkeldi. Kóp jaǵdaıda otpen abaısyz áreket etý saldarynan jalyn shyqqan.
«Dál osy sebeppen 234 órt boldy. Naqty aıtqanda, balalardyń sirińkemen oınaýy, tósekte jatyp temeki shegý, maıshamdy paıdalaný kezinde qaýipsizdik sharalaryn saqtamaý saldarynan ot tutandy.
Temeki shegý kezindegi abaısyzdyq - áli kúnge deıin adam ólimine ákeletin órttiń eń kóp taralǵan sebepteriniń biri. Kóbinese alkogoldi ishimdik ishken adam, temeki shegip jatyp uıyqtap ketedi. Sonyń saldarynan osyndaı qaıǵyly oqıǵalar bolyp jatady, - delingen aqparatta.
Kórshisiniń balkonyna túsken temeki tuqyly da adam ómirin qıyp, qomaqty materıaldyq zalal keltirýi múmkin. Sondyqtan balkonnan barlyq janatyn materıaldardy alyp tastap, terezelerdi jaýyp júrý qajet.
«Balalardyń otpen oınaýy da asa qaýipti. Órt shyqqan kóp oqıǵada balalar ata-analarynyń qaraýynsyz qalǵan. Osynyń aldyn alý úshin tek mektepter men balabaqshalarda ǵana emes, úılerde de olarǵa qaýipsizdik negizderi túsindirilýi tıis», - dep atap ótti ShQO TJD memlekettik órt baqylaý basqarmasynyń bastyǵy Nurjan Ómirjanov.
