ShQO-da jyl basynan beri 3 myńnan astam adam kólikti onlaın tirkedi
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri 3 myńnan astam adam kólikti onlaın tirkedi, dep habarlaıdy QazAqparat tilshisi.
Óńirdegi avtokólik ıeleri bıyl mamandandyrylǵan HQO arqyly óz betinshe 4 myńnan astam memlekettik qyzmet aldy. Onyń ishinde 3 myńǵa jýyq azamat kólik quralyn qaıta tirkese, 1200-den astam adam júrgizýshi kýáligin onlaın aýystyrǵan.
«Ótken jyly egov.kz portaly arqyly 1566 avtokólik qaıta resimdelip, 800 júrgizýshi kýáligi alyndy. Demek, óńir turǵyndary arasynda onlaın qyzmetterdi alatyndar artyp keledi. Avtokólikti qaıta tirkeý qyzmeti egov.kz elektrondyq portalynda «Kólik jáne kommýnıkatsııalar» bóliminde qoljetimdi. Ony onlaın alý úshin satýshyǵa ETsQ kómegimen portalǵa kirý qajet. Sodan keıin satylatyn avtokólik týraly aqparatty engizip, aıyppuldar men salyq qaryzdaryn tekserýge suraý jiberýi tıis. Tólemdi elektrondyq úkimet portaly arqyly júrgizýge bolady. Ótinimge ETsQ-men qol qoıyp, qyzmetti onlaın tapsyrý kerek», - dedi «Azamattarǵa arnalǵan úkimet» ShQO boıynsha fılıalynyń dırektory Azamat Esembýlov.
Budan soń satyp alýshy elektrondyq úkimet portalyndaǵy jeke kabınetinde ótinimmen tanysa alady. Onda aıyppuldardy teksergennen keıin nómirlik belgiler, tehnıkalyq tólqujat jáne tirkeý alymy úshin memlekettik baj tóleýge kóshýge bolady. Mámileni óziniń ETsQ-men rastaǵan soń satyp alýshy mamandandyrylǵan HQO-ǵa tek nómirler men tehnıkalyq tólqujatty alý úshin ǵana barady.
«Avtokólik ıeleri tsıfrlandyrýdyń barlyq artyqshylyqtaryn baǵalap, mamandandyrylǵan HQO-qa qaraǵanda portalda qyzmetterdi jıi ala bastady. Qyzmetterdi onlaın alý - ózindik trend. Bul úrdisti qarapaıym anyqtamalardy qajet etetin azamattar ǵana emes, sonymen qatar avtokólik ıeleri de ustanatyny qýantady», - dedi Azamat Esembýlov.
Esterińizge sala keteıik, avtokólikti qaıta tirkeý Kaspi.kz qosymshasynda da qoljetimdi. Onlaın resimdeý aıaqtalǵannan keıin qujattardy jáne memlekettik nómirlik belgini «elektrondyq úkimet» portalyndaǵy úıge jetkizýge tapsyrys berýge nemese qujatty mamandandyrylǵan HQO-ǵa baryp alýǵa bolady. Búgingi tańda HQO mamandary Kaspi.kz qosymshasy arqyly 2 myńnan astam avtokólikti tirkegen.
