ShQO-da jyl basynan beri 150 órt boldy
ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda jyl basynan beri 150 ret órt shyqqan. Onyń ishindegi órtterdiń 42 paıyzy elektr jabdyqtary men aspaptaryn talapqa sáıkes paıdalanbaýdan bolǵan. Sońǵy osyndaı órt Óskemendegi «Zvezda» saıajaı qaýymdastyǵynyń aýmaǵynda shyqty.
«Oqıǵa ornyna jedel kelip jetken órt sóndirýshiler barlaý júrgizdi. 2 qabatty saıajaıdaǵy shatyrdyń aǵash qurylymdary, esik, jıhaz, turmystyq tehnıka men jeke zattar janyp jatqan. Kóp uzamaı jalpy aýdany 80 sharshy metrdi quraǵan tilsiz jaý tolyqtaı aýyzdyqtaldy. Jalyndy sóndirýge barlyǵy 7 tehnıka men jeke quramnan 25 adam jumyldyrylǵan», - delingen aqparatta.
Vedomstvo dereginshe, shamadan tys júktelgen uzartqysh symdar, tońazytqyshtar, zarıadtaý kezinde qaraýsyz qalǵan uıaly telefondar kóp jaǵdaıda ot shyǵýyna ákelip soǵyp jatady.
«Páterler men jer úı turǵyndary qoldanatyn elektr quraldarynyń sany jyl saıyn artyp keledi. Al órt qaýipsizdigi týraly bári birdeı oılana bermeıdi. Eshqashan elektr qurylǵysyn qosýly kúıde qaldyryp ketýge bolmaıdy. Sonyń saldarynan búkil úıge qaýip tónedi. Páterden shyqqan kezde barlyq qurylǵylardy rozetkalardan óshirip júrińiz», - deıdi oblystyq TJD memlekettik órt baqylaý basqarmasy bastyǵynyń orynbasary Bolat Toqtarǵalıev.